Shillong, Nohprah 19 : Ka Regional Committee ka West Jaintia Hills kala rai ban aiti noh ia ka kaiphod pynbeit pud sha ka Sorkar Jylla hapoh ka arbnai.
Haba pyntip ia kane hadien ba pyniaid ia ka jingialang hynne ka sngi Palei, u Chairman ka Committee bad Symbud Myntri Rangbah ka Jylla Bah Sniawbhalang Dhar ula ong “Ngi la bthah ia ki bor District ba kin pynkhreh ia ka kaiphod (halor ki Shnong hapoh ka Block-I) ha kaba kila kyrpad ban aipor ban pyndep hapoh ka shibnai lane arbnai”.
“Shisien bala dep pynkhreh ia ka kaiphod, ngin sa aiti noh sha ka Sorkar Jylla, ka ban sa pule ia ka hashuwa ban iakynduh ia kiba na Assam” ula bynrap.
Halor ka jingdawa pynphai biang ia ki 36 tylli ki shnong ka Block-I sha Meghalaya, u Bah Sniawbhalang ula ong “Hooid, ki (paidbah) la pynpaw ia ka jingsngew jong ki halor kane bad ngi la shim jingthoh ia baroh ki mat bad ki jingkyrpad jong ki. Hynrei, ki Sorkar jong ki ar jylla kin sa iashong bad ki artylli ki Regional Committee (bad halor ki kaiphod jongngi) kin sa shim rai ia kane ka kam”.
Ula pyntip ba ka Regional Committee kan sa shong jingialang biang ha ka taiew ba ar ne ba lai jong u Kyllalyngkot, 2025.
Nalor kane, u Bah Sniawbhalang u pyntip ba ka Committee kala iatai ruh halor ka jingjia ba pyntrei ka Assam ia ki jingtei ha ka thain Block-I.
“Ngi la ai jingbthah ia ki bor District ba kin leit pynsangeh ia ka jingpyntrei ia kine ki jingtei namar kane ka thain ka dei kaba hap hapoh ka jingiakajia” ula ong haba ban jur ia ka jingdonkam ban pynneh ia ka status quo.
Ha kawei ka liang, u Symbud Myntri Rangbah ula ban jur ia ka jingkongsan ia baroh artylli ki Jylla ban shah ia ka jingpyn trei ia ki kam pynroi halor ka kyndon ba dei ban da pyntip sha ki bor Disrict ba dei khmih, ka bym shym la jia ha kane ka jingjia ba dang shu jia mynta.
Haba pynpaw ba ka Sorkar kala kut jingmut hok ban pynbeit ia ki kam khappud, u Bah Sniawbhalang ula ong ba u Myntri Rangbah ka Assam bad Meghalaya kin sa pynbeit shen ia ka tarik ban leit jurip ia kine ki jaka ba iakajia.
“Watla kam shym la don ka jingbuhpor ia ka jingiakren pud jong ka wat kaba ar, ngi la pyrshang ban pynbeit ia ka kam kham kloi kat kaba lah”ula bynrap.
