Nongstoiñ, Risaw 14: Ka Regional Committee ka West Khasi Hills bala khlieh da u Myntri Sorkar Bah Renikton Lyngdoh Tongkhar kum u Chairman, kala rai ban leit twad jingmut hi dalade sha Langpih shuwa ba kan jam shakhmat sha ka jingia kren pynbeit pud jong ka wat kaba ar bad ka Assam.
Kane ka rai kala mih na ka jingialang jong ka Regional Committee ba long hynne ka sngi ha Trysem Hall jong ka Ophis u Deputy Commissioner, kaba la wan iashimbynta da ki Nongialam Hima, ki Nongsynshar Shnong ka thain Langpih, ki Seng bhalang kiba dei na West Khasi Hills bad kiwei kiwei.
Haba kren sha ki lad pathai khubor hadien jong ka jingialang kaba neh palat lai kynta, u Chairman ka Regional Committee ula ong baka rai ban leit sha ki paidbah ka thain Langpih kan long da ka lynti kaba suk ba sain bad ban iasngewthuh bad ki paidbah khnang ba kan nym mih kano kano ka jingpyrshah ne ki jingkulmar ynda ka jingiakren pynbeit pud kala iaid.
“Ka Sorkar bad ki paidbah hi ruh, ki kwah ba ka Jylla Meghalaya kan ioh ia u pud u sam ym da ka jingia umsnem hynrei da ka lynti jong ka jingsuk” ula ong.
Haba kylli, u Bah Renikton ula ong ba ka Committee kan sa shong jingialang ban iapynbeit ia ka tarik ba ka Committee kan hiar sha Langpih khnang ba kan ioh sngap ia ka jingpynsngew jong ki paidbah ba bun balang halor ka jingiapynbeit pud bad ruh ba kane ka jingiapynbeit pud kan long kaba ai jinghun.
U Bah Renikton ula ong baka jingjurip pud kaba kham kongsan eh kan dei ka jingiajurip lang hapdeng ki Regional Committee ka Jylla bad jong ka Assam.
“Ia mynta hi ngim pat lah ban tip lano kan long kane ka jingiajurip lang ia u pud u sam namar ngi hap ban ap lang ia ka Regional Committee na Assam ba kan ai jingtip lyngba u Chairmam “ ula ong.
Haba iathuh ia ka jingiakren ha ka jingialang, u Bah Renik u pyntip ba ka Committee kala pule ruh ia ka thup kyrteng jong baroh ki 53 tylli ki Shnong bala mynjur da ka Sorkar Jylla ha u snem 2011.
“Lyngba kane jingïalang ka committee ka la pyrshang ban peit thuh bha ïa ka jingdon jong kito ki shnong, ha kaba la lap ba ki don ki shnong ki bym don shuh mynta bad ïa kane la pyntikna ruh da ki bor pynïaid District ka West Khasi Hills kiba la leit ban wad ban pyntikna” ula ong.
“Ki don ruh ki katto katne tylli ki shnong kiba don ha syndah bad ki shnong ba la paw ha ka thup jong ki 53 tylli ki shnong, hynrei ki bym shym la shah kynthup lang ha katei ka thup. Lehse ka lah ban dei kajuh ka shnong tangba la pynkylla kyrteng bad ïakum kita ki shnong yn hap ban bishar bniah” ula bynrap.
Namar kane, u Bah Renikton u pyntip ba ka Committee kan sa bishar bniah lyngba ka GPS ïa kiba kum kita ki shnong kiba don mynta bad ki bym shah kynthup ha la thup jong u 2011. Lada kita ki shnong hap hi ha kato ka thaiñ, kan nym don jingeh eiei ruh em ban ïa pynbeit, u la ong.
