Shillong, Naiwieng 05 : Ka North East Students’ Organisation (NESO) kala rai ban pynlong da ka jingiashong kyllain mungor ha baroh ki nongbah jong ki Jylla ka thain Shatei Lam Mihngi ha ka 9 tarik Naiwieng, kum ka dak ban pynrem ia ka jingbym lah ka Sorkar Pdeng ban leh eiei halor ka kam umsnam bala neh la hynriew bnai ha Manipur.
Ha ka kyrwoh bala pyllait hynne ka sngi U Blei, u Chairman ka NESO Bah Samuel B Jyrwa ula ong ba ka Seng ka pynpaw ia ka jingsngewkhia halor ka jinglong jingman ba jia ha Jylla Manipur.
“La jan hynriew bnai kala iaid hynrei ka jinglong jingman kam shym la idak ba kan jai jai noh bad ia kane lah ba kynnoh ia ka jingbym lah jong ka Sorkar Pdeng ban leh eiei ia kane ka kam ha ka lynti kaba dei, kaba buh pynban ia ka jingim bad ki nongkynti jong ki briew ha ka jingma khamtam eh ka lawei jong ki samla pule” ula ong.
U Bah Samuel ula ong “Namar kane, ka NESO ha ka jingialang jong ka Executive Council ba long ha ka 31 tarik Risaw 2023 ha Guwahati, kala rai ban pynlong da ka jingiashong kyllain mungor ha baroh ki Nongbah jong ki Jylla ka thain Shatei Lam Mihngi ha ka 9 tarik Naiwieng”.
“Kane ka jingiakhih ka dei kaba la pynlong ban pynpaw ia ka jingpyrshah kaba ur jong ngi halor ka jingbym lah jong ka Sorkar Pdeng ban pynkut noh ia ki kam umsnam bala iaid la 6 bnai ha Manipur bad dawa ruh ia ka Sorkar India ba kam dei shuh ban shu phai lyndet hynrei ban wad ia ki lad ki lynti kumno ban lah pynbeit noh kham kloi ia kane ka kam” ong u Bah Samuel.
