Shillong, Nailur 07: Ka Meghalaya Football Association kala lum ia ka jingialang ha ka sngi Saitjain bad shim ia ka rai ban ai jingkyrshan da ka pisa ia ki nongialehkai ka jylla kiba ioh ban mihkhmat ha ka kynhun jong ka India ban ialehkai ha kylleng ki ri.
Kane ka sienjam kadei kaba la padiang da baroh ki nongialehkai ka Meghalaya kiba beh sha ka thong ban ioh mihkhmat ia ka ri ha ki lympung iakob ialehkai ki bapher bapher.
Ki nongialehkai ha ka kyrdan Senior Team (Shynrang bad Kynthei) kin ioh pdiang T.50,000, katba kito kiba mihkhmat ha ka U-23 jong ka kynhun ka India kin ioh T.40,000. Ki nongialehkai ha ka Junior ne Sub-Junior kin ioh T.25,000.
Dang shen ka Meghalaya kala sakhi ia ka jingshah jied bun ngut ki nongialehkai kiba donsap na ka jylla ban shah kynthup ha ka Indian Women’s U-17 bad U-20 team kiba kynthup ia ka Fragrancy Riwan, Ribansi Jamu, Alisha Lyngdoh bad Bonifilia Shullai.
Ha ka liang ki shynrnag, u Manbhakupar Malngiang bad u Banlamkupar Rynjah kila shah kynthup ha ka kynhun jongka India U-17s ha u snem ba la dep bad u Lionel Daryl Rymmei ha ka kynhun jongka U-20.
Haba phai sha ki snem kiba la leit, ki nongialehkai kum u Ricky Shabong bad Halen Nongtdu kila don ha ki kynhun ialehkai, katba ki nongialehkai kiba pawkhmat ka jylla kum u Eugeneson Lyngdoh, Aiborlang Khongjee bad u Rocus Lamare kila ioh ban ialehkai ha ka kynhun ialehaki ka ri India.
