Shillong, Risaw 05 : Ka Meghalaya Editors’ and Publishers’ Association (MEPA) kaba dei ka synjuk jong baroh ki Media House ne ki Lad pathai khubor ha Meghalaya, ha ka sngi Palei, kala rai ban thoh sha ka Directorate of Information and Public Relations (DIPR) pyrshah ia ki YouTubers shimet namar ka jingpyrshang ban ialam bakla ia ki paidbah da kaba ak kum ki nongthoh khubor ne nongpathai khubor.
Ia kane ka rai la shim ha ka jingialang jong ka MEPA ba long ha Shillong.
Ha ka kyrwoh, u General Secretary ka MEPA Bah John W Thabah ula ong ba ka Association kala ioh pdiang ia ki jingujor na ki nongthoh khubor bad nonglum khubor halor ka jingdon ki YouTubers shimet kiba trei kum ki Journalist ban lum khubor, iashimbynta ha ki jingialang Sorkar, press conference bad press briefing ha kylleng ki District ka Jylla.
La ioh ruh ba pdiang ia ki jingujor ba ki don ki YouTubers shimet kiba tah ia ki sticker ‘Press’ wat ha ki kali jong ki.
“Ka MEPA ha ka jingialang ba long ha Shillong hynne ka sngi kala rai ban pynshai sha baroh kynthup ia ki paidbah ba ki Lad Pathai khubor bala ioh jingbit ki dei tang kito kiba la register hapoh ka Registrar of Newspaper of India (RNI) bad bala empanel bad ka Directorate of Information and Public Relation (DIPR), ka Sorkar Meghalaya” ula ong.
Nalor kane, ki nonglum khubor, reporter, correspondent, freelance journalist kin hap ban ioh ia ki Identity Card bala ai da ki Media House (kot khubor, TV Channel, Digital Channel) bad Accreditation Card bala ai da ka DIPR.
