Shillong, Jylliew 02 : Ka Sorkar Meghalaya bad Assam, kila mynjur ban bynshet kam ha ka North Eastern Space Application Centre (NESAC) ba kan pynlong ia ka jingwadbniah lyngba ki kor satellite halor ka jingshlei um ba shyrkhei jong ka sor Guwahati.
Ia kane ka rai la shim ha ka jingialang hapdeng ki Myntri Rangbah ki ar Jylla-Conrad K Sangma bad u Himanta Biswa Sarma, kaba long hynne ka sngi Nyngkong ha Guwahati.
Kat kum ka rai, ka NESAC kan pynlong ia ka jingwadbniah lyngba ka jingring dur na ki satellite ia ki khlaw bapher bapher ha ka thain khappud ka Jylla Meghalaya bad Assam bad ban aiti ia ka kaiphod hapoh ka laibnai.
“Ngi la rai ban iakren ia ka NESAC ba kan pynlong ia ka jingwadbniah lyngba ki kor satellite, la ka long ia ki khlaw bapher bapher, la ka long ia ki wah ne nala kiba tuid um, la ka long ia ki jaka ba sahkut ka um. Shisien bala dep kane ka jingwad bniah ha ki khyndiat bnai ban wan, ngin sa iakren ia ki agency kum ka IIT Roorkee ba kan bishar ban wanrah ia ki sienjam ban weng ia kane ka jingeh kiba lah ban pyntreikam da baroh ar Jylla bad ka ban pynmyntoi ia baroh ar Jylla” ong u Conrad.
Haba pynpaw ia ka jingsngewkhia ia ka jingshlei um ha Guwahati, u Myntri Rangbah ka Meghalaya ula pynpaw ia ka jing sngewkhia ba kumno ki artylli ki Jylla kin lah ban iatreilang ha kaban wad ia ki lad ki lynti ban pynduna noh ia kane ka jing shlei um bad wad ruh ia ki lynti ban leh eiei halor ki jingeh jong ki paidbah ba sah sha ka liang ka Meghalaya, khamtam kito kiba die jingdie ban kamai jakpoh.
Ka kynhun na Meghalaya kiba la iadonlang ha ka jingialang ki kynthup ia u Myntri ka tnad Jngohkai Bah Paul Lyngdoh bad u Chief Secretary Bah DP Wahlang bad kiwei kiwei ki heh Sorkar. Na ka liang pat la iasynran ia u Myntri Rangbah Himanta Biswa Sarma da ki Myntri Sorkar bad ki Heh Ophisar.
