Rai ka MCTODA ban bteng ia ka jingiakahih haduh ban da pyllait ia ki nongialam kiba shah kem

Shillong, Naiwieng 07: Ka Meghalaya Commercial Truck Driver and Owners Association (MCTODA) kala rai ban bteng beit iaka jingiakhih tad haduh ba ka Sorkar kala pyllait iaki nongialam kiba shah kem ha ka miet jongka 5 tarik Naiwieng.

Kane ka rai ka wan wat hapdeng ka jingkhot iakren ka Sorkar ha ka jingpyniaid u Symbud Myntri Rangbah uba khmih ia ka tnad Transport u Bah Sniawbhalang Dhar haka jingdonlang ki Deputy Commissioner (DC) bad Superintendent of Police (SP) jong ka East bad West Jaintia Hills.

Haba pynbna ia kane ka rai, u dkhot ka MCTODA u Bah Lumlang Mawnai u la ong ba watla ka Sorkar kala kular ban shimkhia halor ki mat jingdawa ka Association kynthup ban pyllait ia ki dkhot, ka MCTODA kam pat lah ban shim rai eiei halor ka jingiakhih.

U Bah Lumlang ula ong ba iaka rai ba khatduh yn shim hi hadien bala pyllait ia ki nongialam kynthup u President ka MCTODA namar tang para dkhot kim lah ban shim rai.

Ula iathuh ba ha ka jingialang ba la pyniaid da u Symbud Myntri Rangbah u Bah Sniawbhalang Dhar, ka MCTODA kala pynsngew iaki mat jingdawa bad kala dawa ruh ba ka Sorkar kadei ban pyllait noh iaki nongialam ka Association khlem da pynngat kyndon.

“Ha ka jingïalang ngi la kyrpad iaka Sorkar ban pyllait noh iaki nongialam jong ngi bad naka liang ka Sorkar kala kyrpad ba ngin weng noh iaka jingïakhih bad ka Sorkar kan pyrkhat halor ki mat jingdawa jong ka MCTODA, hynrei mynta hadien ba ngi la ïakren bad ki dkhot ka Association bad ngi la sngewthuh ba ngim lah ban rai tang ma ngi. Ngin ap beit ha haduh ka 10 tarik Naiwieng lada lait jamin ki nongialam bad dei hangta ngin sa shim iaka rai, ban weng ne bteng beit iaka jingïakhih” la ong u Bah Lumlang.

Haba kylli halor ka jingsiew jong ki karkhana Cement ia ka bai kit sha ki trok—kumba la kam da ki karkhana Cement ba ki bud ia ka dor ba la bthah da ka sorkar—ki dkhot ka MCTODA kila kyntait ban jubab eiei, da kaba ong ba kim pat don nongialam mynta.