Shillong, Naitung 30 Ka Meghalaya College Teachers Association (MCTA) kala rai ban ‘Boycott’ ne sangeh ka jingshim klas iaki 1st Semester hapoh ka Four Year Undergraduate Programe (FYUP) kum ka dak ka jingpyrshah ia ka jingrai jubor jong ka NEHU ban pyntreikam ia ka National Education Policy (NEP)-2020 naduh ka 1 tarik Nailar.
Ka MCTA kala shim ia kane ka rai haka jingialang online ba kyrkieh jong ka Executive Committee ba long ha ka janmiet 29 tarik Naitung. Ia kane la pyntip da u Dr A.War Rani, General Secretary ka MCTA ha ka shithi bala phah sha ki Unit bapher bapher ka MCTA hapoh ka Jylla bala ioh copy da Ka Shlem.
“Namar ka rai ban pyntreikam ia ka NEP-2020 daka North Eastern Hill University (NEHU) bad halor ka mat jing dawa jong ka MCTA ban weng noh ia ka jingpynbna ba 12 tarik Naitung, 2023, ka Association ha ka jingialang ba kyrkieh jong ka Executive Committee ba long ha ka 29 tarik Naitung, kala rai ban shim ia ka nongrim ban ialeh pyrshah ia ka rai” ong ka kyrwoh ka MCTA.
Ka MCTA kala pynpaw ruh ia ka jingpynrem kaba jur ia ka jingleh bym suidniew bad jingkyntait ban sngap lem jong ki bor pyniaid ka NEHU ia ka jingsngew jong kiwei khamtam eh u Vice Chancellor, uba la tynruh ban pyntyllun shakhmat ha kaban pyntreikam ia ka NEP-2020 khlem da mynjur da ka Academic Council.
“Sdang naduh ka 1 tarik Nailar, 2023, tad haduh da pynbna da kumwei pat, baroh ki Dkhot ki dei ban ‘boycott’ ne sangeh ka jingshim klas ia ki 1st semester. Nalor kata, la bthah ia ki dkhot ba kin kyntait ia baroh ki jingpynkit khlieh haba iadei bad ka jingpyntreikam ia ka NEP-2023 naduh mynta ka sngi” ong ka shithi.
“Hynrei, haba iadei bad ka 3rd bad 5th semester, ka jingshim klas kan iaid beit khlem kano kano ka jingthut. Namar kata, ki dkhot ki dei ban leit shim klas bad ban pyndep ia ki course kat kum ka por bala buh” la bynrap.
Haba pynpaw ba ka MCTA ka sngewthuh ia ki jingeh ba kane ka rai ka lah ban wanrah, u Dr Rani ula ong, “Hynrei kumba la sakhi ha ki snem bala leit noh ia ki jingshimkhia/jingkut jingmut bala ai halor ki nongrim iakhun jong ka Association, ka long kaba donkam ba ngin tylli bad skhem ha kaban pynthikna ba dei ban burom ia ki rukom treikam jong ki jaka pule jong ngi bad ruh ban peit lem ia ka bha ka miat jong baroh kiba don bynta khamtam lei ki samla pule”.
