Shillong, Rymphang 03: Ka seng sainpyrthei Khun Hynñiewtrep National Awakening Movement (KHNAM) hynne ka sngi thohdieng, kala pynbna ba kan ym pynieng kyrtong satia ha kane ka MLA ilekshon 2023 ha Meghalaya.
Ia kane ka pynbna da u Vice President ka KHNAM bah Thomas Passah uba la iathuh ba ka Party mynta ka kynti kan pynkhreh ban nang pynkhlain shuh shuh iaka party naka bynta ban iakhun ba ka MDC Election ka ban long ha u snem 2024.
Haba kren sha ki lad pathai khubor u bah Thomas ula iathuh ba ia ka rai ban ym pynieng kyrtong ha kane ka election MLA 2023 la shim haka jingialang ka Central Executive Committee (CEC) jong ka Party ha ki sngi bala dep.
“Naduh 2018 ka KHNAM ka don hapeng ka kynrum kynram bad namar ka jingbym biang ka por ban pynkhreh iaka elekshon, ka Party kala shim iaka rai ban nym pynieng kyrtong shuh ha kane ka ilekshon 2023” ong u bah Thomas.
U bah Thomas ula iathuh ruh ba haka jingshisha kila don haduh 9 ngut kiba la pan Ticket naka KHNAM ban iakhun ha kane ka elekshon 2023 hynrei hadien ka jingbishar bniah, ka party ka sngew ba kam dei ka nongrim jong ka KHNAM ban shu pynieng kyrtong tang haka nam lada ym lah ban jop.
Ula ong ba naka liang ka party kala shim iaka rai ba kan nym ialap elekshon ia kano kano ka party ha kane ka elekshon ban wan hynrei kan ialeh ban pynkhlain iaka party ban iakhun ia ka MDC election 2024 bad ha kiwei ki elekshon hadien ha bud.
Haba kylli hato kane ka jingbym pynieng kyrtong naka bynta ka elekshon 2023 kadei namar ka jingphet noh u bah Adelbert Nongrum, u Vice President ka KHNAM ula ong ba ha ka synshar paidbah baroh ki don ka hok ban mih ne iasoh ha kano kano ka party hynrei kam dei satia ka daw ba khlem pynieng kyrtong.
