Ai jingmut ban lum ka KHADC ia baroh 10 tylli ki ADC ka NE
Shillong, Naitung 5: Ka Khasi Hills Autonomous District Council (KHADC) ryngkat ki Khlieh Nongsynshar bad ki kynhun Sengbhalang hynne ka sngi Balang, da kawei ka jingmut kila shim ia ka rai ban pyrshah jur ia ka jingthmu ban pyntreikam iaka Uniform Civil Code (UCC) ha ka jylla.
Ia katei ka rai la shim ha ka jingialang kaba la lum da u CEM ka KHADC Bah Pyniaid Sing Syiem ia kaba la wan ban iashimbynta lang da u Chairman ka KHADC u Bah Lamphrang Blah, ki Executive Member (EM), ki MDC, ki Syiem, ki Rangbah Shnong bad ki Nongialam Sengbhalang.
U Deputy CEM ka KHADC Bah PN Syiem ula ong, ba ka jingialang da kawei ka sur kala rai ban pyrshah jur ban pyntreikam iaka UCC ha ka jylla namar kan ktah jur ia ki riti ki dustur tynrai, ka khyndew ka shyiap, ka jinglong tynrai ka jaidbynriew bad ia ki niam bapher bapher bad kan pynduh bor ruh iaki District Council.
“Ia ki jingai jingmut ha ka jingialang ngin sa pynrung lang ha ka jingthoh kaban ngin phah sha ka National Law Commission hashwa ka 14 tarik u Naitung bad ngin pyrshang ruh ban kynthup ia ki mat kiba kongsan ban pynkhlain iaka jingpyrshah jur iaka UCC” ong u Bah PN Syiem haba iakren bad ki nongthoh khubor.
Ula ong ba ka KHADC kala mynjur iaka Resolution ha ka 24 tarik u Jylliew ha ka Dorbar Lyiur ban pyrshah jur iaka jingthmu ka sorkar pdeng ban pyntreikam ia ka UCC hapoh u pud u sam jong ka Council.
U Bah PN Syiem ula ong ba ka Article 244 (2) jong ka riti synshar ka ri ka long kaba shai kdar ba ka jingpyniaid bad jingkhmih iaki jaka jong ki riewlum kadei ban long katkum ki kyndon aiñ jong ka Sixth Schedule jong ka riti synshar ka ri bad ula ong ruh ba wat ha ka por ba synshar ki phareng, kim shym la nud ban pynduh jait ne pyntlot bor ia ka hok tynrai jong ki Khasi.
Ula ong ba ka KHADC kan sa lum ia ka jingialang bad kiwei pat ki District Council kiba don hapoh ka jylla ban iakren ha kaba iadei bad ka UCC.
Ki nongialam sengbhalang bad ki khlieh nongsynshar kila ong, ba ka sorkar pdeng ka kwah ban pyntreikam jubor ia ka UCC ha ka ri. Kila ong ba dei ban pyrshah jur ia kane, namar ba ki riewlum ki don iala ki riti dustir tynrai bad kine baroh kin sa shah tyllep noh haka UCC bad wat ki District Council ruh kin shah pynduh bor noh.
Kila ai jingmut ruh ba kane ka jingialang kadei ban pynmih tang ia kawei ka sur bad ban phah ia kawei ka jingthoh sha la Law Commission jong ka ri ban pynpaw iaka jingpyrshah ban pyntreikam iaka UCC ha ka jylla Meghalaya.
Nalor kane, kila ai jingmut ruh ia ki District Council ka jylla ba kidei ban ieng ryntih lang kawei ban pyrshah iaka UCC bad ka dei ban don ruh ka jinglum ia ka jingialang jong baroh 10 tylli ki District Council kiba don haka thain Shatei Lam Mihngi ban shimlang iaka rai ban pyrshah jur iaka UCC.
Pule lang ia kane: Pan kaiphod ka Iingkashari naka Sorkar halor ka sienjam ban khate ia jingduna bording ka Jylla
