Shillong, Naitung 05: Ka Toyota TKM ha ka jingiatreilang bad ka Don Bosco Technical School (DBTS) Shillong hynne ka sngi kala plie iaka shlem ai jinghikai lane ka Technical Education Program (T-TEP) ban sam jinghikai shaki samla haki sap bapher bapher.
Ia kane ka shlem ai jinghikai lane ka T-TEP la plie paidbah daka Myntri ka tnat pule puthi kong Ampareen Lyngdoh haka jingdon lang u Executive Vice President of Toyota Vikram Gulati, u Principal ka DBTS Fr. K Puwein lem bad kiwei kiwei de.
Haba kren ha kane ka sngi ka kong Ampareen kala long baka jingplie ia kum kine ki shlem ai jinghikai kan wanrah ka jingkyrkhu iaki samla ka jylla namar kan pynlong iaki ban long kiba la pynkhreh haka por ba ki leit thep kam hadien ha bud.
Ka kong Ampareen kala ong baka Toyota kala shim iaka rai ba biang tam ban iatehlok bad ka DBTS namar kadei ka shlem ai jinghikai ba paka bha hapoh Meghalaya bad kaba la ai jinghikai iaki spah ngut ki samla haki kam bapher bapher.
“Nga kyrmen ba kane ka program T-TEP jong ka Toyota bad ka DBTS kan long shisha ka jingkyrkhu iaki khun samla ban ioh ka jinghikai ha ki bun rukom khnang ba kin long lypa kiba la pynkhreh haka por ba ki leit thep kam kiba bun jait” la ong ka kong Ampareen.
Nalor kane ka kong Ampareen kala kyntu iaka Toyota bad iaka DBTS ban seng lane buh ia ki jaka hikai (Workshop) ban hikai pyntbit shuh shuh iaki samla ha kiba bun rukom jong ka Skill Development,
Naka liang u Vikram Gulati ula iathuh ba ia kane ka T-TEP program la seng naka bynta ban pynthikna ba ki samla ki ba wan naki longïing ba duk bad na ki thain nongkyndong, kin ioh ki jinghikai ba titsa khamtam haba iadei bad ka Skill Development.
U Gulati ula iathuh ba iaka T-TEP program la sdang pyntreikam ha u snem 2006 bad haduh mynta ka Toyota kala buh haduh 63 tylli ki jaka hikai iaki samla khamtam haba iadei bad ka rukom shna iaki kali.
“Ka thong jong ka T-TEP kadei ban sam jinghikai sha ki samla kiba wan na ki thain nongkyndong namar lyngba kane ka program ki samla khamtam kiba wan naki longïing baduk kin ioh ruh ia ka jaka sah bad ka song pisa ban siew bai Tuition” la ong u Gulati.
Pule lang ia kane: Manipur: Iaid paidbah palat 2000 ngut ki VDP ban pynrem ia ka jingkhrai khlieh ia u David Thiek
