Shillong, Jylliew 28 : Ka Khasi Hills Autonomous District Council (KHADC) kala rai ban pyntreikam noh da ka jingsiew online ia ka professional tax.
“Ngi la rai ban tyrwa ia ka jingsiew online ia ka professional tax” ong u CEM ka KHADC Bah Pyniaid Singh Syiem haba jubab ia ka motion ha ka sngi pynkut ia ka dorbar lyiur jong ka Council hynne ka sngi Balang.
Ka KHADC kala iohlum palat T. 10 klur ka professional tax ha ka shisnem.
“Ka jingpyntreikam ia kane ka rukom siew ba thymmai kan iarap shikatdei eh ban tehlakam ia ka jinglait tuh ka khajna bad ngi kyrmang ba kane kan iarap ban nang kyntiew ia ka jingioh lum ia ka professional tax sha ka T. 20 klur” ula ong.
U pyntip baka Executive Committee kan sa khot mardor ia ka jingialang jong ka Tnad na ka bynta ban pyntreikam noh ia kane ka rukom treikam ba thymmai.
Kat kum ka jingong jong u, ka Council ka don jingthmu ruh ban pyndonkam noh da ki kor Computer ha kaba buh jingkhein jingdiah jong baroh ki tnad pynmih pisa jong ka Council.
Shuwa kane haba kyrshan ia ka motion bala wanrah da u MDC ka Nongpoh Bah Balajied Ranee bad u Nongialam ka Liang Pyrshah Titosstarwell Chyne ula ong ba ka khajna bala lum khajna naka profession tax kala kot T. 13 klur hynrei kane ka rukom lum khajna ba mynta ka dei kaba pynshlur ia ka jinglait tuh ki khajna.
“Namar kata, nga sngew ba ngim dei ban pynshlur ban siew ia ka professional tax da ka pisa. Nga kyrpad ia ka Executive Committee ban khmih sani bha ia kane ka kam” ula ong.
Halor ka kam ba iadei bad ka jingai Trading Licence, u CEM ula ong ba ka tnad Trade jong ka Council kam dei ia kaban peit kum ka tnad pynmih khajna.
“Namar lada ngi ong ba ka Tnad ka dei na ka bynta ka jingpynmih khajna, kan mut ban gin hap ban ai Trading Licence sha baroh kiba wan applai naka Council” ula ong.
U bah Pyniaid ula ong ba ka EC ba thymmai kala rai ban nang pynkhlain ia ka tnad Enforcement jong ka tnad Trade.
“Ngim dei ban ailad ia ki Pulit Enforcement ba kin shu shong ha Ophis hynrei kin pynthikna ba kin leit sha ki jaka iew ban talasi ia ki kam khaii ba be-ain” ula bynrap.
Ha kajuh ka por, u CEM ula ong ruh ba shen un sa khot ia ka jingialang bishar kam bad baroh ki Tnad khnang ban lah pynjanai ia ka jingtreikam jong ka Council.
