Shillong, Jylliew 26: Ka Khasi Hills Autonomous District Council (KHADC) kala rai ban thoh shaka sorkar Jylla ban dawa pynkiew noh iaka bhah khajna ba ioh lyngba ka jingkhaii dewiong.
“Ka executive committee (EC) kala rai ban thoh shaka sorkar jylla ban pynkiew noh iaka bhah khajna ba dei ban ioh lyngba ka jingkhaii dewiong” la pyntip u Executive Member (EM) ba dei khmih iaka tnat Taxation bah Fantin J Lakadong haba jubab iaka jingkylli bala wanrah da u MDC ka Mawkynrew u bah Martle N Mukhim.
U bah Fantin ula kular ruh baka EC hapoh ka jingialam u CEM ka KHADC u bah Pyniaid Sing Syiem kan trei naka bynta ban kyntiew iaka jingioh lum khajna ka council.
U bah Fantin ula pyntip ruh baka EC kan shim khia haba iadei bad ka jinglait kai ka khajna ka district council khamtam namar ba ka council ka don hapdeng ka jinghiran pisa.
Hashuwa kane u bah Fantin ula kyntait iaka jingdawa u bah Martlle baka EC kadei ban shim daka sienjam ban dawa naka sorkar jylla ban pynkiew iaka bhah khajna naka sorkar jylla lyngba ka jingioh na u dewiong.
“Haduh mynta ka KHADC ka ioh 25% ka bhah khajna bad kane ka long kaba duna bha bad dei namar kane ka sorkar jylla ruh kadei ban pynkiew noh shaka 35% ka bhah khajna ba dei ban ioh na u dewiong naka bynta ban kyntiew iaka ioh ka kot ka Council” ula ong.
U bah Martle ual ong ruh ba ka KHADC kadei ban tip haduh katno ka sorkar ka ioh lum khajna na ki marpoh khyndew.
Naka liang u EM badei khmih iaka tnat Taxation ula kyntu ia u bah Martle ban kiar naka jingpyndonkam iaka ktien ‘Beij’ pyrshah iaki ophisar ka sorkar jylla hadien ba u bah Martle ula kynnoh ba ki Ophisar ki long kiba beij nama kim lah ban lum jingkhien haba iadei bad ka jingioh lum khajna naki marpoh khyndew bad naka liang u bah Martle ula pynpaw ba ka jingkren jong u kam dei ba u khien poh iaki ophisar ka sorka jylla ne district council.
Haba shim bynta ban kyrshan iaka Motion, u Nongialam ka Liangiatei u bah Titosstarwell Chyne ula ong baka Council ka don iaka hok ban tip haduh katno ka sorkar jylla ka ioh lum khajan naki marpoh khyndew.
“Teng teng nga sngew kumba ngi dei ki nongkhrong ki bym hun katba ngi ioh, ngim tip haduh katno ngi ioh namar ka sorkar jylla ruh ka pyllait iaka bhah khajna katba ka sngew bit” ula ong.
Haba kren halor ka jinglait kai ka khajna, u bah Titos ula ong “Ngi la iohi baka don ka jinglait kai ka khajna naka jingkhaii dewiong bad mawshun kiba khaii khlem ki shalan bad kane ka pynsyrwa kai iaka khajna. Ngi dei ban kynmaw ba ka District Council ka treikam lyngba ka jingioh bhah khajna naki marpoh khyndew”.
U bah Titos ula iathuh ruh ki don ki riewshimet khamtam ki bar jylla kiba kamai taksi daka ba pyndonkam iaki number plat jong ki kali arshaka khnang ba kin lait ban siew khajna shaka sorkar bad Council bad ki don ruh kiba shu thied beian iaki Taxi Stickers bad kane ka ktah iaka ioh ka kot ka KHADC.
Haba iadei bad kane u MDC ka Nongthymmai u bah Latiplang Kharkongor ula pynpaw baka la dei ka por ban mynjur daka Resolution hapoh ka ïing jong ka KHADC ban dawa pynkiew iaka bhah khajna naka sorkar jylla.
Pule ruh: Kular ka Myntri ban pynpoi ïa ki tiar ha MCH Hospital Nongstoiñ hadien 3 bnai
 kala rai ban thoh shaka sorkar Jylla ban dawa pynkiew noh iaka bhah khajna ba ioh lyngba ka jingkhaii dewiong.){kind=link}