Shillong, Naiwieng 09 : Ka Joint Action Committee (JAC) NEHUTA, NEHUNSA bad NEHUSU ha ka sngi Palei, kala rai ban pynjur ia ka jingiakhih da kaba khot ia ka jingsangeh treikam ba khlem pud naduh ka 13 tarik Naiwieng, kum ka dak ban pyrshah ia ka jinglong mynthi u Vice Chancellor ka NEHU bad ka jingsngap jar jar ia ki 9 tylli ki mat jingdawa.
Ia kane ka rai la shim ha ka jingialang jong ka Joint Action Committee (JAC) ba long hynne ka sngi.
Ki khyndai tylli ki mat jingdawa ki kyntnup ia ka jingweng noh ia u Technical Officer/Senior Consultant bala kynnoh thung beain, ka jingthung ia u Statutory Officer and University Engineer, ka jingjot ratha ka Health Centre, ban pyllait ia ki Nonghikai bad Technical Stagg na ki kam Ophis, ban thep lang ia ka NEHU Act, Statutes bad Ordinance ha ka Official Website ka NEHU, ban pynlong man u snem ia ka Convocation, marking system, ban kynthup lang ia ki dkhot ka NEHUSU kum ki nongmihkhmat ha ka Academic Council bad ban shong bishar biang ia ka Educationally Backward Area Quota na ki Block sha ki Shnong.
Ka JAC kala pyntip ba ki jingshakri ba kongsan kata kum ka jingpyniaid ia ki bos, ka jingsam um, ka bording, ka health centre, ki tnad kiba iadei bad ki kam thungkam bad pension cell kin lait na kane ka jingsangeh treikam.
