Shillong, Naiwieng 16: Ka Joint Action Committee (JAC) jong ka NEHUTA, NEHUNSA bad NEHUSU hynne ka sngi Palei, kala pynbna ban pynsangeh shuwa shipor iaka jingiakhih ba khlem pud sngi.
Ia kane ka jingialang la shim hadien bala wai ka jingiakren bad u Vice Chancellor (VC) ka NEHU.
Haba pyntip ia kane, u Chairman ka JAC Prof Lakhon Kma ula iathuh baha ka jingialang, u VC ula pyntip ba u Technical Consultant Rohit Prasad u khlem don hapoh ka NEHU mynta la 15 sngi bad dei namar kane, ka NEHU kam donkam shuh ia u Rohit ban don hapoh ka skulbah.
“Halor u Rohit Prasad, u VC ula pyntip ba un sa shim iaki sienjam ban pynkut noh iaka jingdon bynta u Rohit Prasad hapoh NEHU” la ong u Prof Lakhon.
U Prof Lakhon ula pynbna ba iaka mynta, ka JAC kan weng shwa shipor (Suspend) iaka jingiakhih bad naduh lashai ka sngi, ka jingshim klas ia ki samla pule kan long biang kumba ju long.
U Prof Lakhon ula ong ba kane ka jingweng shwa (Suspend) iaka jingiakhih kam mut bala pynkut noh iaka jingiakhih hynrei kadei ban ai por ia u VC ba un khot iaka jingialang jong ka Academic Council (AC) ka ban long ha u bnai Nohprah.
