Shillong, Jylliew 24: Ka Iingkashari Meghalaya High Court kala rai ban peit pyrman bad ban buddien ia ka jingiaid ka kam shna surok ha Ri-lum Garo Hills namar ka jingsniew palat ki surok hapoh ka thain.
Kane ka rai ka Iingkashari ka long halor ka jinglong jingman ka surok Agia-Medhipara-Phulbari-Tura kaba la jot bad ia kane ka kam la shim bishar ha ka PIL bala mudui da uwei u nongshongshnong u AH Hazarika hynne ka sngi thohdieng.
Ha ka jingshong bishar, ka Sorkar Jylla kala pynpaw ba kala dep shim ia ki sienjam ban maramot noh shipor ia ki jaka ba sniew jong kane ka surok, ban pan ia ka song pisa ba donkam, ban buh ia ki contractor ki ban pyntrei ia ka kam ha kine ki jaka ba palat ka jingsniew ka surok bad ban khot tender ruh ia kine ki kam.
Ka sorkar Jylla kala aiti ruh ia ki katto katne ki kot kisla ba pynpaw ba kala dep ban shim ia ki sienjam ba shipor watla ka long kaba eh ban pyndep ia ka jingmaramot ia ka shilynter hynrei ka jingpyrshang kala don ban lah pynlong ia kane ka surok kaba lah ban iaid ki kali.
Ka Iingkashari kala pynpaw ia ka jingkyrmen ba ka Sorkar kan pyntrei noh kham sted ia ki sienjam ba kala dep shim khnang ba ki paidbah ba sah ha kine ki thain bad ba pyndonkam ia kane ka surok manla ka sngi kin suk noh ha ka leit ka wan.
Haba hukum ia u nongmudui bad ia ka Sorkar Jylla ban pyntip ba haduh katno ka kam maramot kala iaid, ka Iingkashari ka la pynpaw ba kan peit pyrman bad buddien ia ka jingiaid ka kam maramot ia kane ka surok khamtam ba bun na ki Sub Division ka Ri-lum Garo ki dei ki bym don ia ka surok rong ba pyniasoh sha ki District Headquarter.
Haba kdew ia ka kaiphod jong u nongmudui ba ki bynta jong ka surok AMPT hapdeng ka Rajabala haduh Hallidaygank ka dei ka bym long shuh ban iaid kali, ka Iingkashari kala hukum ia ka Sorkar ban phaikhmat kyrkieh sha kane ka surok bad ban pyndap noh ia ki thliew ki syhar ha kane ka surok khnang ba ki paidbah kin lah ban pyndonkam ia ka surok watlada ki hap ban iaid suki tad haduh ban da dep shna ia kane ka surok.
Ka Iingkashari kala buh ban shong bishar biang ia kane ka mukotduma ha ka 22 tarik u Naitung.
