Shillong, Lber 19 : Ka seng Hynniewtrep National Liberation Council (HNLC) kala rai ban tynjuh pyrshah ia ka rai jong ka Sorkar Pdeng ban pynjlan ia ka jingkhein beain pyrshah ia ka seng na ka bynta san snem.
Haba pyntip ia kane ha ka sngi Balang, u Nongmihkhmat ka HNLC bad President ka Hynniewtrep National Youth Front (HNYF) Bah Sadon K Blah ula iathuh ba ka HNLC kala thung ia u nongsaid ain ban iasaid ia ka mukotduma jong ka ba tynjuh pyrshah ia ka rai ka Sorkar Pdeng ban pynjlan ia ka jingkhein beain hakhmat ka Unlawful Activities Prevention Act (UAPA) Tribunal, ka ban sa shong bishar ha Shillong ha ka 22 tarik Lber.
Ka HNLC kala thung ia u Bah Fernando Shangpliang kum u nongiasaid ain ka seng ha ka 6 tarik u Lber.
Lah ban kdew hangne ba ka Ministry of Home Affairs kala pynmih ia ka jingpynbna ha ka 14 tarik Naiwieng, 2024 ba pynbna ia ka HNLC ha ryngkat bad baroh ki shnat treikam jong ka kum ki seng ba beain.
Haba kylli, u Bah Sadon ula ong “Ka daw ba ka HNLC ka kwah ban tynjuh ia kane ka kam da ka lynti ka ain ka dei namar ha ka por ba dang iabunkam ha ka jingiakren iasuk bad ki nongialam ka HNLC kiba don ha Shillong, ngi la buh hakhmat ha kiba bun ki khep ha ki jingialang ba ka Sorkar ka dei ban weng noh ia ka jingkhein beain bad ka jingniew kumka seng beain hashuwa ba ka HNLC kan wan sha ka jingiakren iasuk. Hynrei la paw ba ka rynsan ha ka synshar khadar ba ka HNLC ka la pyrshang ban ioh kala pulom namar ka Sorkar Jylla bad Sorkar Pdeng kim shym la kren shai ba kin weng noh ia ka jingpynbna ia ka HNLC kum ka seng ba be-ain”.
“Nga kyrmen ba ki Iingkashari, ka Sorkar Jylla bad Sorkar Pdeng kin sngewthuh ba ka HNLC ka dang shimkhia bha ha kaban wan shakhmat ha ka jingiakren iasuk. Kala pulom ha ka rynsan ka synshar khadar bad mynta ka seng kala shim ia ka rynsan jongka Iingkashari bad kyrmen ba ki kam kin iaid ha ka lynti kaba biang” ula bynrap.
 kala rai ban tynjuh pyrshah ia ka rai jong ka Sorkar Pdeng ban pynjlan ia ka jingkhein beain pyrshah ia ka seng na ka bynta san snem.){kind=link}