Shillong, K’lyngkot 30 : Ka Congress kala rai ban nym pynlong satia ia kino kino ki rally kiba heh ha kane ka elekshon MLA-2023 bad kan nym wanrah ruh ia ki stad ialap elekshon (star campaigner).
Uwei u Nongialam ba rangbah ka Congress ula ong ba ka party kan nym pynlong ia kano kano ka rally heh lane ban wanrah ia ki stad ialap elekshon hynrei kan pynleit jingmut ha kaban pyniadei bad ki nongthep vote na ka bynta ka elekshon ban long ha ka 27 tarik Rymphang.
Haba iakren bad ki Nongthoh khubor, u President ka Meghalaya Pradesh Congress Committee (MPCC) ma Vincent H Pala ula ong “Kiba bun na ki kyrtong jong ngi ki dei kiba iakhun ha ka sien ba nyngkong eh ia ka elekshon. Ka party jong ngi kan pynleit jingmut ha ka jingrung sha ki thliew iing ki nongthep vote bad pynlong ia ki rally rit ha ki shnong ki thaw ban pyniadei bad ki nongthep vote”.
Une u Nongialam ka Congress ula pyntip ruh ba ma u ialade ruh un nym pynlong satia ia kano kano ka rally heh ha Sutnga- Saipung Constituency ka ban un mih ban iakhun ha kane ka elekshon. “Mynta ka kynti, ngin nym wanrah ia ki Nongialam jong ngi ban ialap elekshon. Ngin pyniadei bad ki Nongthep Vote bad ngin iathuh ha ki shaphang ka party jong ngi” ula ong.
U ma Vincent ula kam ba ka Congress kan jop 30-35 seat ha ka elekshon jied nongmihkhmat sha ka Iingdorbar ba 60 ngut ki Dkhot ka Iingdorbar Thaw Ain ka Jylla, ka ban long ha ka 27 tarik Rymphang.
Ula ong ruh ba ka Congress kala pynieng ia bun ngut ki kyrtong ba dang khynnah bad ki dur thymmai naba ka Jylla ka donkam ia ki Nongialam ba dang khynnah ban ialam ia ka Jylla.
