Shillong, K’lyngkot 27 : U Nongialam ka BJP ba khmih ia ka Meghalaya M Chuba Ao hynne ka sngi thohdieng, ula pyntip ba ka BJP kala rai ban nym mih satia na ka Sorkar Meghalaya Democratic Alliance (MDA) ba ialam da ka National People’s Party (NPP).
“Ngi don ha ka sorkar synrop…lada ngi mih noh..ka jingkynnoh kan wan sha ngi bad ngim kwah ba ka jingkynnoh kan wan sha ngi..Ai ba ngin pyndep ia ka samoi da ka jingsuk” ong u Chuba Ao haba iakren bad ki nongthoh khubor haba kylli halor kane ka kam.
U Ao ula kam ba ka BJP kala leh ia ki jingkhein jingdiah hadien ka jingailad pura ia ka NPP ba kan pynbeit ialade. Ula ong ba ka jingtyrwa ban mih noh na ka Sorkar MDA ka dei kaba la tyrwa da u briew shimet ha ka rynsan jong ka party ba kan iakren.
“Ngi la iakren bad rai ba satang shibnai ba ka elekshon kan wan, balei ba ngin mih noh” ong u Ao.
Haba kylli la ka BJP kan iatreilang biang bad ka NPP hadien ka elekshon, une u Nongialam ka BJP ula ong “Ha ka politics hi, baroh kiwei kiwei kiba lah ban long beit”.
Hynrei ula ong ba ka BJP kala pynieng kyrtong na baroh 60 tylli ki constituency bad ka party ka sngewskhem ba kan jop ban wan ha ka bor ha Meghalaya.
“Ngi sngewskhem bha ba ngin jop bad jop bun. Ngi dei ka National Party, ngi hap ban shim lang ia baroh ki regional party namar ngim long kum kiwei pat ki party…Ngin ym shim ia ki…ngin shim ia baroh haba ngi pyniaid ia ka Ri” ula ong.
Halor ka rai ka BJP ban ym kynthup ia ka NPP ha ka Sorkar Manipur, u Chuba AO ula kular ba katei ka jinglong jingman kan ym jia ha Meghalaya. “Ka Manipur ka iapher. Ki don katto katne kiba mih na ka Sorkar bad pyrshang ban pynthut ia ka BJP. Ta ka daw ka jingiatreikam kam treikam satia. Mynta ki lah ban kyrshan, kam don jingeh satia. Ha Meghalaya hi kane kan ym jia kumne”.
Haba iai ban ba yn ym don ba lah ban thaw sorkar khlem ka BJP, une u Nongialam ka BJP ula ong “Ngi dei ka National Party bad khlem pep, ki Regional party kin donkam ia ka jingiarap jong ngi namar khlem ma ngi kin ym lah ban leit sha Delhi. Ta ka daw khlem ma ngi, kin ym lah ban thaw sorkar”.
La ka BJP ka kloi ban iatreilang bad ka AITC ha Meghalaya, u Ao ula ong ba ia kane ka kam yn sa iakren ynda la poi ka por.
Kat kum ka jingong jong u, baroh kila iakawang ktieh markylliang ha ka elekshon bad kane ka dei ka kam ba ju jia beit. “Wat ki paralok ka BJP ki ju kawang ktien ia ngi bad ngi ruh ngi kawang ktieh ia ki hynrei ia kane ngi klet noh hadien ka Result” ula ong.
Halor ka jingkynnoh ba ka BJP kala donkti ha ki kam thied kulai, u Chuba Ao ula ong ba kam long kaba dei iaka party ban bsuh khlieh ha kiwei ki political party naba baroh ki Regional Party ki dei shibynta jong ka North East Development Alliance (NEDA) ba ialam da u Nongialam ka BJP bad Myntri Rangbah ka Assam Himanta Biswa Sarma.
