Shillong, Nailur 26 : Ka kynhun kiengatiar bala pynduh pyndam-ka Achik National Volunteers Council (ANVC) bad ka ANVC-B kila rai ban leit jurip ia ki project bapher bapher bala pyntreikam da ka Sorkar Jylla kum shibynta ban pyntrei ia ka soskular iasuk (Agreed Text for Settlement) ba iasoi ha u 2014.
“Ki nongsoi kin leit jurip ia ki project kiba dang pyntrei bad kiba la dep bad kiba la treikam” ong u Chairman ka ANVC-B bad MDC ka Tura Bernard N Marak ha ka kyrwoh bala pynmih hadien ka jing iashimbynta ha ka jingialang bala pynlong da u Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Thohdieng.
“Ki don bun ki project bala pyntreikam da ki Tnad Sorkar ia kiba hap ban leit jurip markhmat ban pyn shisha da ki nongiasoi ia ka soskular iasuk” ula bynrap.
U Bernard ula pynpaw ia ka jingsngewhun ia kaei kaba mih na ka jingialang, kaba la neh haduh lai kynta eiei, bad kaba la pynlong hadien hynriew haduh hynniew snem.
U pyntip ba ka jingialang kala iakren ia ki jingiaid ki kam kiba la pruid dak ha ka soskular iasuk kynthup ka jingseng ia ka Medical College, Captain Williamson Sangma State University, ka jingpynkha ia ki District thymmai bad ki Block bad ka jingkyntiew kyrdan ia ki jingtei bapher bapher.
U Bernard ula pyntip ba ka Sorkar kala kular ban ai ka song jingiarap ka ban pyllait noh ia ka Garo Hills Autonomous District Council (GHADC) na ki jingeh ha ka pisa pilain, ka ban iaid thik pa thik kat kum ka soskular iasuk.
Ka jingiakren kala mih ruh halor ka jingkyntiew kyrdan ia ki Civil Hospital kiba la don mynta, ki ITI, Polytechnic, Engineering College bad Horticulture College, bad kumjuh ruh ban thep briew ha ki kam ba lait ha ki College ka Sorkar.
Ka jingialang kala iakren ruh ia ka jingpyndonkam ia ka Forest Fund bad ka Rural Local Bodies bad Urban Local Bodies Fund.
“Ka jingdon ki Village Council la pynshai da u DyCEM ka GHADC bad kiwei, ia kiba la mynjur da u DyCM bad kiwei kiba don ha ka jingialang” ula ong.
Ka Sorkar Jylla kala kular ba ka kad liengsuin ruh kan treikam biang noh bad yn pyntrei sted ia ki project shna surok, ong u Bernard haba bynrap ba ka Sorkar kan sa buddien ia ka 125th Constitutional Amendment Bill, kaba long kongsan bha ban pyntreikam ia ka soskular iasuk.
La thung ruh ia ki District Level Nodal Officer ban wanrah ia ka jingiatreilang kaba iajan hapdeng ka Jylla bad ki District, ula bynrap.
 bad ka ANVC-B kila rai ban leit jurip ia ki project bapher bapher bala pyntreikam da ka Sorkar Jylla kum shibynta ban pyntrei ia ka soskular iasuk (Agreed Text for Settlement) ba iasoi ha u 2014.){kind=link}