Guwahati, Naitung 17 : Khlem da pynsngap ia ki khubor ba saphriang kylleng, ka All India United Democratic Front(AIUDF) ka la rai ban kyrshan ia u kyrtong ba pynieng da ka UPA, u Yashwant Sinha ha ka elekshon jied President jong ka Ri.
Haba kren bad ki lad pathai khubor, u heh ka AIUDF u Badruddien Ajm ha ka sngi U Blei u la ong ba da kawei ka rai ki la mynjur ban kyrshan ia u kyrtong president ba pynieng da ka UPA, u Yashwant Sinha.
“Ngi la rai ban kyrshan ia u kyrtong ba iakhun pyrshah ia ka BJP namar ngi don la ka jong ka nongrim treikam kiba iapher bad ka BJP. Kumta ngin kyrshan noh ia u Yashwant na bynta ka elekshon President, ” u la ong.
Lah ban kdew hangne, ka AIUDF ka don 16 ngut ki MLA bad uwei u MP ha Lok Sabha.
Ka AIUDF kadei ka party synrop jong ka Congress ha ka elekshon MLA ha u 2021 ha Assam hynrei dei hadien ka elekshon ba ka jingiadei hapdeng kitei ki ar tylli ki party ka la kylla noh da khongpong.
Baroh ar tylli ki party ki la kynthoh kawei ia kawei pat ba ki kyrshan ia ka BJP ha ka elekshon Rajya Sabha.
