Shillong, Jymmang 12: Ka United Democratic Party (UDP) kala rai ban sa leit iakynduh shen ia u Myntri Rangbah ka Jylla Conrad K Sangma ban iakren halor kiba bun ki jingeh ba mih hapoh ka Jylla kynthup ka jingpyntreikam ia ka Roster System bad ka State Reservation Policy.
Kane ka rai kala mih na ka jingialang jong ka Core Committee ka UDP kaba long hynne ka sngi Thohdieng.
Haba pyntip ia kane, u Vice President ka UDP Bah Allanty Franklin Dkhar u pyntip ba kane ka jingialang kala iathir sani halor ka jingpyntreikam iaka Roster System bad iaka bhah thungkam lane ka Reservation Policy jong ka jylla.
Ula pyntip ruh ba ka jingiakren kala mih halor ka jingshah pyndik ki paidbah nong shong shnong ka jylla ha ki thain khappud bad ka jylla Assam khamtam haba iadei bad ka jingjia kaba dang shu jia shen hapoh ka thain Khanduli.
Nalor kane, u pyntip ba ka jingialang, kala iathir ruh halor ka jingeh ba ki paidbah ka jylla ki iakynduh haba iadei bad ka jingshah ot bording kaba daki kynta man ka sngi.
