Shillong, Nailar 27: Ka 30th Inter School bad 12th Inter College Karate Championship, ba la pynlong da ka All Meghalaya Karate-Do Association, ka la kut noh hynne ka sngi Ba-ar hapoh ka Sports Authority of India Campus kaba don ha NEHU.
Ha kane ka lympung, ka St Anthony’s Higher Secondary School kala rah ïa ka nam lahduh jong ki khynnah shynrang kaba ki bat naduh 2023, katba ka Sacred Heart Girls Higher Secondary School ka la rah iaka nam lahduh haka liang ki kynthei bad ka Shillong College ka la rah iaka nam lahduh haka liang ki College.
Kane ka lympung kala thaw rekod namar ki don haduh 609 ngut kiba wan shim bynta mynta u snem.
Ïa ki nongïashim bynta la jied na ki 95 tylli ki skul bad 6 tylli ki kolej napoh ka jylla Meghalaya.
Ki kynhun ba wan ba ar ki long ka Sunrays Secondary School haka liang ki khynnah shynrang, ka Synod Higher Secondary School haka liang ki kynthei bad ka St Anthony’s College haka liang ki college.
Ki nong nongïalehkai karate kila pyni iala ki sap bad bun na ki mynta ki don ha ka kyrdan kolej hadien ba ki la kiew na ki kyrdan ba rit ha ki snem ba la leit noh.
Iaka jingïalehkai kaba kham itynnad bha la sakhi naki khynnah ka Sacred Heart Girls, ka Sunrays bad ka Synod HSS namar ki bym ju long napdeng ki skul karate kiba pawnam.
Kane ka jingsdang paw ki khynnah ka pyni iaka jingaiti bad ka jingtrei shitom jong ki samla karate, kumjuh ruh ki coach, ki nonghikai bad ki kmie ki kpa.
La sam ïa ki khusnam Individual Best Karateka hynne ka sngi kaba dei ruh ka sngi pynkut iaka lympung kaba lai sngi.
Ki khusnam ki kynthup sha u Trevor Ryntathiang na ka Sevenset HSS (junior boys), u Nathaniel J Thongni na ka All Saints Diocesan HSS (senior boys), ka Naomi Yuvinie Sylliang na ka Sacred Heart Girls HSS (junior girls), ka Dominica P Kharbani na ka Sacred Heart Girls HSS (senior girls). u Ialamphang Kharkongor jong ka Shillong College (ki shynrang kolej) bad ka Durka Padit jong ka Shillong College (ki Kolej kynthei).
U kongsan ha kane ka sngi pynkut iaka lympung u dei u C. T. Shyamdeo, Deputy Director jong ka SAI Centre, Shillong.
Lah ban kdew ba iaka lympung la plie pyrda u ka Kong Isawanda Laloo, secretary ka tnad Sports & Youth Affairs ha ka jingdon lang Working President jong ka Meghalaya State Olympic Association u Bah John F Kharshiing bad u General Secretary ka MSOA u Bah Finely L Pariat lem bad kiwei kiwei.
