Shillong, Jymmang 03 : Ka St Anthony’s College bad ka Seng Khasi College kila ioh ban rah ia ka nam “Champion of Champions” ha ka jingiakop iakhun kti ki samla pule College jong ki Kynthei bad ki Shynrang, bala pynlong da ka Seng Khasi College kum shibynta jong ka jingrakhe ia ka jingdap 50 snem ka College.
Haduh 14 tylli ki College kila wan ban iashimbynta ha kane ka jingiakop iakhun kti Inter-College Arm Wrestling Compettion bala pynlong ha ka 2 tarik Jymmang bad ka Seng Khasi College ka la ioh ban rah iaka nam ‘Champion Team’ (Boys & Girls Category).
Kine ki College ki kynthup ia ka St. Anthony’s College, St. Edmund’s College, St. Dominic’s College, St. Mary’s College, Sankardev College, Shillong Polytechnic, Synod College, Shillong Commerce College, Seng Khasi College, B.B.S College, M.L.C.U, Mawlai Presbyterian College, Umshyrpi College bad ka Women’s College.
Ha ka jingiakop jong ki kynthei, ha ka 50kg, ka Pynsuklang Lyngdoh (Seng Khasi College) ka la ioh ban khur iaka jingjop da kaba pynliem ia ka Daihunshisha Mawlong (Seng Khasi College).
Ha ka 55kg, ia ka nam lahduh la ioh ban rah da ka Merisha Thongni (Seng Khasi College) da kaba pynliem ia ka Jolene V Diengdoh (St. Edmund’s College).
Ha ka 60 kg, ka Senebi Syngkli (St. Anthony’s College)ka la khur ia ka jingjop da kaba pynliem iaka Riteeka Sarki (B.B.S College).
Ha ka 65 kg, ka Yirmi Jagoi (Women’s College) ka la pynliem ia ka Kriti Noroh (St. Edmund’s College) bad ha ka 70kg, ka Ladapbiang Malieh (Seng Khasi College) ka la khur iaka jingjop da kaba pynliem ia ka Baiancy Kharbani(St. Mary’s College).
Haba phai sha ki shynrang, u samla Shemladbha Khongwir (Seng Khasi College) u la khur iaka jingjop ha ka 55kg da kaba pynliem ia u samla Edmund Kshiar (St. Anthony’s College) katba u samla Shanbhalang Rynjah (St. Anthony’s College) u la khur ia ka jingjop ha ka 60kg da kaba pynliem ia u samla Teiboklang Warjri (Seng Khasi College). Haba phai pat shaka 65kg, u samla Soshim Kasar (St. Edmund’s College) u la khur ia ka jingjop da kaba u la pynliem ia u samla Enstone R Marak (Shillong Commerce College).
Ha ka 70kg, u samla Tadak Dui (St. Edmund’s College) u la pynliem noh ia u samla Russel Marboh (Seng Khasi College). Ha ka 75kg, u samla Bamang Tajik (St. Dominic’s College) u la khur iaka jingjop da kaba pynliem ia u Franky K Lamin Gashnga (Sankardev College). Ha ka 80kg, u samla Jyohanan D Nongrum (St. Edmund’s College) u la khur ia ka jingjop da kaba pynliem ia u Mangjylliew Marwein (Sankardev College).
Ha ka 85kg, u Banangaiboklang Fancon (Seng Khasi College) u la khur iaka jingjop da kaba pynliem ia u samla Joseph Laltlanhlua (St. Dominic’s College). Ha ka 90kg, u Saikupar Marpna (Seng Khasi College) u la khur ia jingjop da kaba pynliem ia u Yuvraj Sing (Umshyrpi Collge).
Ha ka jingiakhun ban iaknieh ia ka nam ‘Champion of Champions’, naka liang ki kynthei ia ka nam lahduh la ioh ban khur da ka samla Senebi Syngkli (St. Anthony’s College) katba naka liang ki shynrang, u samla Shemladbha Khongwir (Seng Khasi College) u la ioh iaka nam lahduh.
Ia ka jingiakhun la wan ban sakhi lang da u Bah Bateilang S Rumnong bad bah Richard H. Dkhar ba dei President bad Secretary ka Seng Khasi College ryngkat u bah W.B Rynjah Principal, ki nonghikai bad kumjuh ki khynnah pule jong ki college ba la wan ban iashim bynta ha kane ka jingiakhun.
