Nongstoiñ, Ïaiong 26: Ka skul Sibsingh Higher Secondary School kala ioh ban rah ia ka nam lahduh jong ka District Level Inter School Athletic Meet 2024 ka West Khasi Hills, kala noh hynne ka sngi nyngkong hapdeng ka jingshongshit bad Iphuh Iphieng bha.
Kane ka lympung ialehkai ka dei kaba la sdang naduh ka 24 tarik haduh ka 26 tarik u Ïaiong 2024 ha Nongpathar stadium Nongstoiñ.
Ïa katei ka lympung ialehkai la pynlong da ka ophis ka District Sport Officer, Nongstoiñ bad haduh 25 tylli ki skul na ki bynta bapher bapher jong ka District, kiba la wan ban ïashim bynta shitrhem ha katei ka lympung ha ki kyrdan bapher bapher kynthup naduh kiba hapoh ka 14, 16 bad hapoh ka 18 snem jong ki kynthei bad shynrang.
Ha kane ka lympung, ka Sibsingh Memorial Government Higher Secondary School Nongpyndeng, ka la ioh rah ia ka nam lahduh bad ïoh khur bun tylli ki takma ksïar. Bud sa ka St. Peters Higher Secondary School Pyndengrei bad ka Mawrang Secondary School Rambrai pat ka la ïoh ban bat ïa ka kyrdan kaba lai.
Nangta ïa ka nam best athlete under-14 boys la ïoh da u Alvil Kharbani na ka St Peters HSS, Under-14 girls Phibanrishisha Rashir na ka Rongrin RMSA school, Under-16 boys la ïoh da u Filberstone Snaitang na ka Sib Singh HSS, under-16 girls Bakyntihun Jyndiang na ka skul JNV, under-18 boys la ïoh da u Pynshai Manik Kharbani na ka Sib Singh HSS bad under-18 girls la ïoh da ka Ioris Syiem na ka Mawrang SS.
Best team ki Under-14 boys la ïoh da ka St Peters HSS, Under-14 girls la ïoh da ka Dapboklang Giri Memorial SS, Under-16 boys la ïoh da St Peters HSS, Under-16 girls la ïoh da ka St Francis HSS bad Under-18 boys la ïoh da ka Sib Singh HSS. Ha ka March Pass ïa ka nam lahduh la ïoh da ka Anderson HSS bad ha ka kyrdan ba ar la ïoh da ka Mount Hermon SS.
Na ka liang u kongsan u ba la wan khnang ban pynhiar ïa ka lama jong kane ka lympung dei u Bah P. B War Nongbri, Assistant Director of Sport and Youths Affairs jong ka sorkar jylla.
Nangta I kong Balarina Syiem District Sport Officer ka West Khasi Hills District, ki principal na ki skul bad college, ki nonghikai, ki khynnah skul bad kiwei kiwei kiba la wan ban sakhi lang ïa kane ka lympung ïalehkai.
