Shillong, Lber 16: Ka Shillong Lajong Football Club kala ioh rah ia ka nam lahduh jong ka OC Blue Shillong Premier League 2024 ha ka sien kaba 5, da kaba pynrem ia ka Mawlai SC da 2-1 ha ka jingiakhun kaba la long hynnin ka sngi Saitjain ha SSA Stadium ha First Ground, Polo.
Kane ka jingiakhun kala long kaba shongshit bha, ha kaba ki nongialehkai jong kitei ki ar tylli ki kynhun kila ialehkai dohiap hakhmat jong ki riewieid ia ka jingialehkai football kiba la wan ban sakhi ia kane ka jingiakhun.
Naduh kaba sdang ka kylla step, kine ki ar kynhun kila ialehkai bha ha kane ka jingiakhun kaba khatduh, ha kaba ka Lajong kala donkam beit ban jop ia kane ka jingiakhun ban iohrah ia ka nam lahduh, katba ka Mawlai kala donkam tang ban shu iakhaid ban iohrah ia ka nam lahduh jong ka SPL.
Ka SLFC kala ioh ban thep ia ka kol ha ka minit kaba 10 lyngba u Abhay Chettri bad nangne kala nang bteng ban ialehkai bha.
Ha ka kylla miet ka SLFC kala bteng ban iakhun tyngeh bad kala ioh thep ia ka kol ka baar ha ka minit 76 lyngba u Samchaphrang Lato kaba la pynthikna syndon ba kan khur ia ka jingjop, hynrei hashwa ban wai artad ka jingiakhun u nongialehkai jongka Mawlai u Damanbhalang Chyne ula ioh thep ia ka kol ha ka 88 minit lyngba ka penalty. Watla ka por kala sah sa tang katto katne minit, ka Mawlai kala iakhun tyngeh ban ioh thep sa shi kol ban iakhaid hynrei kane ka jingpyrshang kala pulom noh bad ka Lajong kala ioh khur ia ka jingjop.
Watla kine ki ar tylli ki kynhun kila ioh khur mar 45 point, hynrei ka Lajong kala ioh ban khur ia ka nam lahduh jong ka SPL 2024.
Da kane ka jingjop, ka Shillong Lajong, kala kylla long ka kynhun kaba la jop bad rah ia ka nam lahduh jong ka SPL haduh 5 sien bad ka Mawlai kaba la bat ia ka nam lahduh kala duh noh ia ka kabu ban rah 3 sien kynthih ne Hat-trick ia ka SPL.
Ka Lajong kaba long ka lahduh jong ka SPL kala ioh ia ka khusnam bad ka T.6 Lak, katba ka Mawlai kaba wan baar kan ioh ia ka khusnam bad ka T.3 Lak bad ia kane ka cheque la aiti da u Myntri ka kam ialehkai u Bah Shakliar Warjri kum u kongsan.
U Deibormame uba la thep 20 kol ha kane ka samoi ialehkai, ula ioh ia ka nam Top Scorer bad ia kane ka khusnam la aiti da u President ka Meghalaya Football Association u Bah Hamletson Dohling ha kaba la iadonlang ki nongkitkam ka SSA, Meghalaya State Olympic Association bad na ka Directorate of Sports and Youth Affairs.
Kum shi bynta ban kyrshan ia ka jingpynlong ia ka lympung ialehkai football SPL khamtam ha kaban pynmih ia ki nongialehkai kiban mihkhmat ia ka jylla Meghalaya, u Bah Shakliar Warjri ula aiti ia ka shithi kaba ka sorkar jylla kala mang T.8 Lak ia ka SSA bad ia kane la aiti ha u General Secretary ka SSA u Bah Dipshon L Nongbri.
