Shillong, Jymmang 15: U Bah Hamlet Dohling uba dei u nongai buit u Myntri Rangbah ka jylla, mynta ka sngi u la pynhap pyrda noh ia ka 3rd Inter School Sport Meet 2025 jong ka Khasi Jaintia Presbyterian Synod Sepngi kaba la pynlong ha Madan SAI, NEHU.
Kane ka 3rd Inter School Sport Meet 2025 kala sdang ha ka 14 tarik mynta u bnai bad la pynkut noh mynta ka sngi, bad ka phang pdeng jong kane ka inter school meet ka dei “Beh Pyrshah Sha Ka Thong”.
Haduh 54 tylli ki school kiba dei na ki saw tylli ki zone ha kane ka School Sport Meet 2025 . Kine ki saw tylli ki Zone, ki kynthup ia ka Mawkyrwat, Nongstoin, Sohra bad Shillong Zone.
Ka jingthmu ba kongsan jong ka Khasi Jaintia Presbyterian Synod Sepngi ban pynlong ia kane ka lympung ialehkai ka long ban plia lad ia ki khynnah skul ba kin ia ithuh iwei ia iwei pat kiba dei na ki skul Balang jong ka Presbyterian.
Haba kren kum u kongsan ha ka sngi pynkut ia kane ka inter school meet u Bah Hamlet Dohling u la ai ka jingiaroh ia ka organising committee kaba la lah ban pyniaid beit pyniaid ryntih bad kaba jop ia kane ka programme.
Kum kane ka programme ka iadei dor bha bad kum kane ka por ban pynlong ia kum kine ki sport meet bad ka jingmih ryntih ki khynnah skul ban ia shim bynta ha ki jingialehkai bapher bapher kala dei lypa ka jingjop ia ki namar ba kim shym la lehrain ban pyni ia ka sap ka phong kaba ki don ong u Bah Hamlet.
Haba phai sha kane ka sport meet ia kaba la sakhi ia ka march pass kaba wan ba-ar na ka liang ki kynthei la ioh rah da ka Mairang Presbyterian Secondary School bad kaba la ioh rah ia ka nam jop kadei ka school KJP, Shillong.
Na ka liang ki shynrang ia ka nam ba-ar la ioh rah da ka Jakrem Presbyterian Secondary School bad ia ka nam lahduh la ioh rah da ka Pariong Secondary School.
Ka Overall Champion, ne ka lahduh ha baroh ki jingialehkai ka leit sha ka Nongtoin Zone kaba la rah shi syndon kum ka lahduh.
