Shillong, Jymmang 19 : Ka kynhun ialehkai Mawlum Tyrsad kala ioh rah ia ka nam lahduh ha ka lympung ialehkai phutbol jong ka Mawlum Tyrsad Sports & Cultural Club ha Tyrsad.
Kane ka kynhun kala iakhun ia ka phainal pyrshah ia ka kynhun Kyiem Football Club na Wah Lyngkien ha ka jingiakhun ba long hynnin ka sngi. Ka Mawlum Tyrsad kala pynliem ia ka Kyiem FC da ka jingiashut tie breaker hadien ka jingiakhaid ba mar arkol haduh ba kut ka 90 minit ka por ialehkai.
Ia kane ka lympung ialehkai la pynhap pyrda da u Bah Wellbirth Rani, Chairman ka NEIPF bad President barim ka seng Federation of Khasi Jaintia & Garo People (FKJGP) kum u kongsan ha ka jingiadonlang u MDC ka thain Bah Lamphrang Blah.
Ka kynhun ba ioh rah ia ka nam lahduh kala ioh rah sha iing ia ka trophy bad ka pisa ba T. 80,000 bad ka kynhun ba wan ba-ar kala ioh rah ia ka trophy bad ka song pisa ba T. 40,000. Ia kine ki khusnam la sam da u Kongsan bad u Symbud Kongsan.
