Nongstoiñ, Jymmang 05: Ka kynhun ïalehkai Football jong ka Mawlarshong FC ka la khur ïa ka nam kum ka lahduh ha ka lympung Nongstoiñ District Sports Association 2025, hadien ba ka la lah ban pynliem ïa ka Pyndengrei SC da saw kol la ar lyngba ka tie breaker, ha ka phainal jong kane ka lympung mynta ka samoi.
Ha ka jingshisha katkum ki points ka Mawlarshong FC ka la dep rah lypa ïa ka League jong ka Super Division jong ka NDSA, hynrei ki nongïalam ka NDSA ki la pynlong ïa ka League kum ka Cricket jong ka Indian Premier League, kaba hap donkam ïa ka Qualifier 1, Qualifier 2, Knockout lane Eliminator bad kumta ter ter.
Kumta, ka Mawlarshong FC ka la hap ban ïakhun sa kine ki jingïakhun ban poi sha ka phainal bad mynta ka sngi ka 5 tarik u Jymmang 2025, ka la rah ïa ka nam lahduh da kaba pynliem ïa ka Pyndengrei SCSC.
Ha ka jingïakhun phainal hapdeng ka madan ktieh kaba la idei ban ong pynban kum ka pynthor thung kba, ki rang ïalehkai na ki ar liang mamla ki la ïakhun doh ïap doh im naduh ba sdang ban pashat bol bad bun ba lait sharud ban kaba ai sha ki paralok jong ka team.
Hateng hateng lei isynei pynban ïa ki rang ïalehkai namar ha ka jaka ban sei ïa kita ki sap ki phong lane kita ki skill ïalehkai, hap sei pynban ki dohksah ba eh jwat tasam, haduh ba don napdeng ki rang ïalehkai na baroh arliang ba shu ïoh pynban da I yellow card kha ma kha.
Haduh 90 minit tam ruh ym don ba thep kol bad watla ki arliang mamla ki da ïa ïoh eh ka kabu thep kol ruh, hynrei mar syn poi hajan kol, ki rang thep kol baroh arliang ki shu kyllon lyndang noh ha jan kol, la kum kiba ïoh bat electric current, katba ka bol pat shu her kai sha dien dieng kol.
U kongsan ha kane ka sngi dei u MLA Bah Gabriel Wahlang u ba la ai jingkren bad aiti ruh ïa ka trophy sha ka nam lahduh jong ka Mawlarshong FC na ka shnong New Nongstoiñ, kaba mynta u snem 2025 ka la kheit ïa ka nam kum ka lahduh.
Ka khusnam ka la leit ruh sha kito ki samla ba tbit jong kane ka samoi, kiba la sei kyrpang ka sap ka phong jong ki ha kane ka lympung, kum kita ki samla donsap ha ki kyrdan bapher bapher, kiba kita ki nongmikhmat ka NDSA ki la jied bad ai ruh ki khusnam ha kane ka sngi.
