Shillong, Nailar 31: Ka Mawkriah West kala rah ia ka nam lahduh jong ka Shillong Sports Association’s Third Division 2025 da kaba pynrem ia ka Umlyngka da 3-0 ha ka Final kaba la long ha SSA Stadium, First Ground, Polo, ha ka sngi Saitjain.
Ka jingjop ka Mawkriah West kadei lyngba ka jingthep kol u Honour Lucky Nongbri ha ka minit kaba 18, u Hostarfield Kharbudnah ula thep ia ka kol ha ka 47 minit bad u Insporjoy Rynjah ula thep ia ka kol ha ka 89 minit.
Baroh ar tylli kine ki kynhun mynta kila kiew sha ka kyrdan ban iakhun ha ka
Second Division kaban long ha u snem 2026.
Ka jingiakhun ia ka final kala long kaba shongshit ha kaba kala dap smam da ki nongpeitkai bad ki nongkyrshan jong ka Umlyngka bad ka Mawkriah West.
Ka Umlyngka kam shim la lah ban thep kol ha ki 4 tylli ki jingiakhun kiba la dep bad kala jop da ka jingshut ia ka Tie Breaker bad kane kadei ka sien kaba san ba ka Umlyngka kam shim la ioh ban thep kol.
Mar ia sdang ka jingiakhun ha ka kylla step u Samborlang Nongbsap ula ioh ia ki kabu hynrei ym shim la lah pat ban thep kol hynrei ka Mawkriah West kala ioh ban thep shi kol ha ka kylla step.
Ka Umlyngka kala iakhun tyngeh bad pyrshang ban ioh thep kol ha ka kylla miet hynrei kala mad pynban ia ka jingshah thep sa 2 kol ha ka Mawkriah West kaba la pynjem khnap syndon ia ki nongialehkai ka Umlyngka.
Ia ka jingpynlong ia ka Third Division la bei tyngka da ka Shillong Recreation Ground Trust (SRGT), kaba la pyniaid bad khmih ia ka madan Polo la bun phew snem. Ki Nongialam ka SRGT kiba kynthup ia u Bah Wallamphang Roy bad u Bah Danny M Pariat bad u President ka Meghalaya Football Association u Bah Hamletson Dohling ryngkat bad kiwei pat ki nongialam kila wan ban donlang ban sakhi ia kane ka jingiakhun ia ka final.
Ka Mawkriah West kaba la rah ia ka nam lahduh kala ioh rah ia ka song pisa kaba T. 80,000 katba ka Umlyngka kaba la rem ha ka final kala ioh ia ka song pisa kaba T.40,000. U Sunshine ula ioh ia ka nam Player of the Final, katba u Wanborlang Lyngdoh Nongbri jong ka Umrynjah ula ioh ia ka nam Top Scorer da kaba ioh thep 7 kol.
Ka SSA kan bteng ban pynlong ia ka jingialehkai ha ka sngi Nyngkong ia ka Second Division bad kumjuh ia ka Shillong Premier League ha kaba ka Rangdajied United kan iakhun pyrshah ia ka Nongrim Hills ha ka por 4:30 nohphai sngi.