Nongpoh, Naiwieng 26: Ka jingiakhih ban pyrshah halor ka jingshah siat iap ki 5 ngut ki khasi ha Mukroh kaba la neh mynta la 3 sngi, bad kane ka jingiakhih kala ktah ia ka iew ka hat bad wat ia ki iew soh ha shilynter ka surok Bah kiba ju pyniaid iew sha ki nongwankai sha ka Jylla.
Kane ka jingktah ia ka iew ka hat ha Ri-Bhoi kala jia na ka jingshah pyrrkhing ia ka rung ka mih ki kali Tourist na Assam ban wan kiew sha Meghalaya namar ka jingjia ha Mukroh.
Haba u nonglum khubor u la ïoh ban ia kren bad ki nongshong ïew mynta ka sngi kiba kynthup naduh ki nongdie doh, nongdie jhur bad ki nongdie soh, ki la pynpaw iaka jingeh ba ki shem halor ka jinghiar ka ïew ka hat bad ong ba ka jingduna jong ki nongleit nongwan ka la ktah shi katdei eh iaka die ka thied bad ha kine ki sngi bun ki mar ki la shu sah kut bad hap ban bret noh namar ba kim long shuh ban die.
Haba pynpaw ia ka mynsiem sngewlem ia kiba la iap na ka jingjia Mukroh, kine ki Nongshongiew kila ong.
“Lada kane ka jingiakhih kan dang bteng, ki jingeh kin wan lynshop ia ki namar kin hap ban shu bret lut iaki jhur ki doh bad ki soh ki pai kiba la dep ban thied”.
Na ka liang ki nongshong ïew ki kyrpad ruh iaka sorkar ba kan shim khia ha kaban pynbeit noh ia kane ka kam khnang ba ka jingshong shngain kan wan biang.
