Dawa panmap ia ka kot khubor Shillong Times
Shillong, Jylliew 30 : U nongaiktien ka National People’s Youth Front (NPYF), kala pynpaw ia ka jingbynniaw ban iohi ba ka party thymmai kaba dang shu rung ha ka jylla ba tip kum ka All India Trinamool Congress, ka thmu ban wanrah ia ka rukom leh baheh ne kata ka VIP culture ha ka Jylla.
Kane ka jingkynnoh kala mih na u Nongaiktien ka NPYF Bah Bajop Pyngrope MDC ka Rambrai-Jyrngam haba kren halor ka jingshah pyndik ki lad pathai khubor ha ka jingwan u National General Secretary u Abhishek Banerjee hynnin ka sngi ha Shillong ban plie ia ka Ophis ka AITC ha Lachumiere.
“Ngi la iohi ba wat haba wan u President, Prime Minister lane u Home Minister jong ka Ri ruh ym ju iohi ba ki lad pathai khubor kin shah pyndik haduh ba kin shim ia ka rai ban ym shim bynta ha kato ka jingialang,” u la ong.
Da kaba kynthoh ba kadei ka jingdkoh ha ka rukom pyniaid ia ka prokram, u Bah Bajop u la ong ruh ba katei ka party ha ka jingshisha ka la dei ban pynbiang da ki Pass ban pynsuk ia ka leit ka wan jong kito kiba ka khot kumba ju leh kiwei pat haba wan ki heh ki hain ha ka jylla.
Ha kawei pat ka liang, ka NPYF ka la ong ruh ba kim sngewtynnad satia ban iohi ba katei ka party thymmai ka sin da ka kyrteng kaba kim sngewtynnad pyrshah ia u Myntri Rangbah ka Jylla, Conrad K Sangma.
“Na ka liang ka NPYF bad ka NPP ngim lah satia ban pdiang ia katei ka jingkren jong u Banerjee namar ka jingkynnoh ka long khlem da don satia ia ki jingshisha,” u la bynrap .
U Bah Bajop ula pyntip ruh baka NPYF ka dawa ia kawei ka kot khubor Shillong Times ba kan panmap shisyndon halor ka jingthoh ba kynthoh ia u Myntri Rangbah ka Jylla Conrad Kongkal Sangma kum u Conman Sangma.
“Ngi dawa ba kane ka kot khubor kan panmap mardor lem kumta ka NPYF kan sa ai da ka mukotduma pyn mynrain durkhmat pyrshah ia kane ka kot khubor” ula ong.
Shuh shuh u ong ruh ba ka jingkynnoh ba ka NPP kadei u virus bad ba ka TMC kadei ka vaccine ne ka dawai, na ka liang u Bah Bajop u la ong, “Ban khot virus ia ka party kaba don haduh 37.5 persen ki nongthep vote kiba kyrshan ia ka party kadei ka jingkren bein ia ki.”
Halor ka jingkam pat ba ki dei u dawai, na ka liang u Bah Bajop u la ong ba kim pat ju ioh sngew mynno mynno ha ka history ban don uta u vaccine Trinamool ne ba don kita ki scienstist kiba la shna ia utei u dawai. “Kumta shwa ban kren da pyrkhat bha 100 sien,” u la ong.
Kawei pat ka mat kaba utei u nongai ktien u iathuh ka long ba ba ki la dawa na kawei na ki kotkhubor na ka jylla ba kadei ban panmap halor ka jingpynmih ia ki kyntien ki bym sngewtynnad pyrshah ia u Myntri Rangbah ka Jylla ia kaba la kren da u National General ka AITC ha ka jingwan jong u sha Shillong.
