Shillong, Jylliew 20 : Ka Myntri Pla tyngka ka Ri Nirmala Sitharaman, ha ka sngi ba-ar ba wan iuhkjat ha Meghalaya, kala leit jngoh ia ka shnong Larnai ha West Jaintia Hills bad iakren bad ki nongshna jingshna da ki kti kiba pynneh pynsah ia ka nam ka Jylla ha ka jingpynmih ia ki khliew dew byrtha nala tynrai bala ioh ia ka GI Tag.
Kala leit ruh ban iuhkjat ha Shre Maa Jayantee Temple bad ka Nartiang Heritage Complex, kaba pyni ia ka jingriewspah ka Jylla ha ka dei riti, ka jinglong mynsiem bad ka nam ka burom bas ah ha ka khana pateng.
Ha Shnong Larnnai, la batai ia ka Sitharaman halor ka rukom shna khiew dew byrtha, kaba la shna da ki pateng la pateng bad kaba dei shibynta jong ka jingithuh ia ka deiriti bad ka kamai kajih jong ki trai shnong. Ki khiew dew byrtha ka shnong Larnai ka dei kaba la ioh ia ka Geographical Indication (GI) namar ka jingpher bad ka jingpyni ia ka dei riti tynrai.
Ka Myntri kala iakren bad ki nongshna jingshna kti bad ki dkhot jong ki kynhun shna khiew dewbyrtha, haba iaroh ia ka jingpyrshang jong ki ban pynneh ban kyntiew ia ka kam shna jingshna kti nala tynrai.
La pyni ruh ia ka rukom shna khiew dew byrtha ha kane ka jingleit jngoh jong ka, kaba pyni naduh ka rukom khleh ia ka dew byrtha, ka jingpynwandur da ka kti, ka jingthoh dak bad kiwei kiwei.
Ha kane ka jingpyni ia ka rukom shna, ka Sitharaman kala iasnohkti lang bad ki nongshna bad pyrshang ruh da la ki jongki kti ban pynwandur ia u khiew dewbyrtha, ia kaba la batai artad artad da ki nongshna ka thain.
Shuwa kane, ka Sitharam kala leit jngoh ia ka Shri Maa Jayantee Temple bad pyndem ha ka jingduwai. Bala ngeit ba kala kynjoh palat 600 snem, kane ka Temple ka dei kaba la khein kyntang kum kawei na ki 51 tylli ki Shakti Peetha bad ka bat ia ka jingmut kaba khraw ha ka niam bad ka histori.
Hadien kane, ka Sitharaman kala leit jngoh ia ki mawbynniaw ha Nartiang, kawei na ki heritage site ha ka Jylla. Ha kane ka jingleit jurip, kala leit jngoh ruh ia ka jingpyni nam ia ki mar bala ioh ia ka jingithuh GI Tag, kynthup u Sohniamtra Khasi, Memong Narang, Shynrai Lakadong, jain Garo, ki khiew dew byrtha ka Larnai bad ka Chubitchi ka Meghalaya.
