Shillong, Rymphang 04: Ki nongpyniaid kali kamai trai Jylla, ki la aiti daka dorkhas sha Symbud Myntri Rangbah ba khmih iaka tnat Transport Bah Sngiawbhalang Dhar ba pyrshah iaka hukum ba la bthah ban pyndait iaki Vehicle Location Tracking Devices haki kali kamai kiba iaid hapoh ka Jylla.
Ki nongpyniaid kali kamai kila kdew ba ka jingpyrshah ban pyndait ia ki Vehicle Location Tracking Devices kadei namar ka jingrem ka dor, bym biang network haki katto katne ki jaka hapoh ka Jylla, ktah ia ki kam shimet bad ka jingbym donkam naka bynta ki kali kamai trai Jylla.
“Ka jinglut ha kaba thied bad ban pyndait iaki Vehicle Location Tracking Devices ka long kaba rem bad kane ka ktah iaki nongniah kali kamai trai Jylla kiba duna haka ioh ka kot” ong u President ka East Khasi Hills Local Taxi Welfare Association (EKHLTWA) Bah Wandonbok Jyrwa.
Ka EKHLTWA bad kiwei ki kynhun ki la pyrshah kham mynshwa ia ka iaka hukum ba la bthah ban pyndait iaki Vehicle Location Tracking Devices haki kali bad kila dawa ba kane ka hukum kam dei ban treikam iaki kali kamai kiba iaid hapoh ka Jylla.
“Ngi kyrpad da ka jingsngewrit ban pyllait iaki kali kamai trai Jylla na kane ka hukum bad ban pynsangeh noh ia ka jingpyntreikam tad haduh ban da iamir jingmut bha bad ki kynhun pyniaid kali kamai” u la ong.
