Nongpoh, Risaw 17: Ka Elaka Nongpoh Sirdarship ryngkat ka Synjuk ki Nongsynshar Raid ka Elaka Nongpoh Sirdarship hynne ka sngi Balang, ki la pyrshah jur ia ka jingkam trai ia ka Nongkhyllem kaba dei ka Reserved Forest da kata ka 13 ki nonghiar pateng ka Nongkhyllem.
Ka Elaka Nongpoh Sirdarship ha ka jingialam u Acting Sirdar Bah Pillar Stone Syiem Nongshai lem bad ka Synjuk ki Nongsynshar Raid, kila lum ia ka jingialang ba kyrkieh hynne ka sngi bad shim ia ka rai ban pyrshah halor ka jingkam trai ia ka Nongkhyllem kumba la mih ha ki lad pathai khubor.
Haba ia kren bad ki Nongthoh Khubor, u Acting Sirdar bad u President ka Synjuk ki Nongsynshar Raid Bah Jedwin Lyngdoh ki la ong ba ka Elaka bad ki Raid ki pyrshah jur ia katei ka jingkam trai da ki katto katne ki kynhun kiba kam ialade ba ki dei kita kiba hiar na ka 13 pateng ka nongkhyllem.
Ki la pynshai ruh hapoh ka Elaka Nongpoh Sirdarship ki don haduh 12 Raid bad kumba long haduh mynta ki Raid kiba dang don ia ka jingsynshar da ki Lyngdoh hapoh ka Elaka ki don 6 tylli ki Raid bad kiwei ki Raid ki don kiba la hap sha ka Hima Mylliem bad ki don kiba la duh noh na ka jingshim ka sorkar ia ka Reserved Forest ha Nongkhyllem.
Ki la pynshai ruh kitei ki 6 tylli ki raid kiba dang don haduh mynta ki kynthup ia ka Raid Nongpoh, Raid Nongkhrah, Raid Nongkharai, Raid Nongkyrla, Raid Sohkhwai, bad ka Raid Nonglyngdoh kiba hap hapoh jingsynshar ka Elaka Nongpoh Sirdarship.
Kiwei pat ki Raid ki kynthup ia ka Raid Myrdon kaba la don la ka jong ka jingsynshar, ka Raid Marwet bad Nongspung ba la hap hapoh ka Hima Mylliem bad kiwei pat ki Raid ki la duh noh na ka daw ba ka sorkar ka la shim ban pynlong kum kata ka Reserved Forest ba kynthup ia ka Raid Nongkhyllem.
Ki la pynshai ruh ba kumno kita ki kynhun ki nud ban kam ia ka Nongkhyllem lyngba kata ka 13 ki nonghiar pateng ka Nongkhyllem, namar ka sorkar ka la shimti ia ka Nongkhyllem ban pynlong kum kata ka Reserved Forest naduh u snem 1909 bad kitei ki kynhun pat ki dang mih tang ha u snem 2016 ia kaba ka Elaka bad ki Raid jong ka Elaka kim don jingtip satia.
