Nongstoiñ, Nailur 28: Ka seng Meghalaya Youth Federation (MYF)-Mawshynrut Circle kala pynpaw ia ka jing pyrshah kaba jur ia ka jingpynbna jong ka Tnad Bording ban aiwai noh ia ka shnat treikam jong ka Meghalaya Energy Corporation Limited (MeECL)-Riangdo Sub Division sha ka kompani shimet.
“Ka MYF ka pyrshah jur ia kane ka jingpynbna. Ka jingpyrshah ka dei namar ngim lah satia ban shaniah ia ki kompani shimet.Wat mynta ruh ka MeECL kam pat lah pynbiang ia ka bording, katno tam ki kompani shimet” ong u samla Pynshai Kharbani, President ka MYF-Mawshynrut.
Kat kum ka jingong jong u, ki Nonshongshnong ka thain kila mad jingeh bha mynta la slem na ka jingbym lah jong ka MeECL ban pynbiang ia ka bording ba thikna, kaba lam sha ka jinglip bording khah khah manla ka sngi bad manla ka miet haduh ba ki paidbah ba pyndonkam bording kila ud la thnum.
Une u Nongialam ka MYF u ong ba ka jingpynbna jong ka Tnad Bording ban aiti noh ia ka Sub Division sha ki kompani shimet khlem da pynlong ia kino kino ki jingpynshai paidbah, ka long kaba shu leh hak dak khlem da burom satia ia ki nongpyndonkam bording, kiba pynmih pisa man u bnai ban siew ia ka bai bording.
“Ngi sheptieng ba ki kompani shimet kin sa leh kat kaba mon bad kin ym sngap satia ia u paidbah bad kane kan sa wanrah ia ka jingeh kaba khraw bad ka jingsngewsih ia ki paid nongshongsnong ka Mawshynrut Civil Sub Division baroh kawei” ula ong.
