Shillong, Nailur 13: U Chief Executive Member ka KHADC u Bah Pyniaid Sing Syiem, hynne ka sngi Thohdieng ula on, ba ka Council kan sa phah da ka jingthoh sha ka Sorkar Jylla ba kam dei ban shah ia ka kynhun kaba ialap ban khang bam doh masi ba kan wan pynlong yatra ha jylla.
Haba iakren bad ki nongthoh khubor, u Bah Pyniaid ula ong, ka Council ka pyrshah jur ia ka kynhun kaba ialap khang bam doh masi bad ka Council kan ym lah ban pdiang namar ba ka jaidbynriew ka don iala ka bam tynrai ha kaban bam ia ki jingbam bad ia ka doh kum ka doh masi bad kiwei kiwei.
“Ka Council kan ieng ban pyrshah ia kino kino ki kynhun kiba thmu ban shimkabu ia ka jinglong kyrpang ka jaidbynriew la ka long haka bam ka dih, ka kup ka sem, ka khyndew ka shyiap bad kiwei kiwei bad lada ki pyrshang ban pynbakla noh, kim banse ban khang ia kum kine ki kynhun” ong u CEM bad ka bynrap ba ka kynhun kaba nabar ka jylla kam dei ban wan tuklar ha kane ka jylla.
U CEM ula ong ba ka Council kan sa phah da ka jingthoh sha ka sorkar jylla ba kadei ban tehlakam ia ka kynhun kaba ialap ba dei ban khang bam doh masi ha kane ka jylla bad kan pynkynmaw ruh ia ka sorkar jylla ba 98% na ki jaka ha ka jylla kidei kiba hap ha ka Sixth Schedule.
