Pyrshah ka HYC ia jingtyrwa pynkiew bai klas ha ki College Sorkar

Shillong, Iaiong 06 : Ka Hynniewtrep Youth Council (HYC) kala pyrshah jur ia ka jingtyrwa ban pynkiew ia ka bai klas ha ki college Sorkar ha Jylla.

Ha ka shithi sha u Myntri ka tnad Pule Puthi Bah Lahkmen Rymbui ha ka sngi Nyngkong, ka HYC Education Cell kala ong ba kane ka jingthmu kan nang tynrong ia ka jingkit ba khia ia ki samla pule na nongkyndong bad kiba wan na ki long kiba duna ka jingioh.

“Kane ka rai ym tang ba ka long ka bym iahap bad ba palat pud hynrei ka dei ruh kaba long pyrshah ia ka bha ka miat ki samla pule namar ka nang pynkhia ia ki samla pule bad kito kiba dei na nongkyndong bad kiba duna ka jingioh” ong ka shithi.

Ka HYC kala iasaid ba ki college Sorkar ki dei kiba la seng ban ai ia ka lad ba kumjuh bad kaba lah ban kyrshan ha ka jingpule ia ki higher education bad kano kano ka jingpynkiew ia ka bai klas kan pynduh ia kata ka nongrim.

Ka Council ka buh jingkylli ruh ia ka jingpynksan ka Sorkar ba ka jingpyniaid hi ia ka pisa tyngka ka long kaba donkam, haba ong ba kam dei ban wan “ha ka dor jong ka jinglah ban ioh bad ka jingpynrung lang.”

“Haba kdew ia kiei kiba jia, ka shithi ka pynpaw ba ka jingpynslem ban pynlait ia ka scholarship katno kala pynsyllang ia ki samla pule bad ka jingpynkiew sa ka bai klas kan nang ktah shuh shuh ia ka jingpule” kala ong.

Ka HYC kala dawa ban weng noh mardor ia ka jingtyrwa, pynkiew ia ka jingai song pisa sha ki college, pynlait ha ka por kaba biang ia ka scholarship bad ban iasyllok bad ki samla pule hashuwa kano kano ka jingpynkylla ia ki policy.