Pyrshah ka HYC ba thungkam biang ia ki Nongtrei bala shongthait ha Assembly

Shillong, Jymmang 11 : Ka jingthungkam biang ia ki nongtrei bala shongthait ha ki honorary post hapoh ka Meghalaya Legislative Assembly Secretariat kala shah pynrem jur ha ka seng Hynniewtrep Youth Council (HYC), kaba ong ba kane ka rukom leh ka pynduhlad ia ki samla bala nang la stad ba khlem kam khlem jam ka Jylla.

Haba kynthoh ia ka Office order ba pynmih ha ka 26 tarik Lber bad 5 tarik Jymmang 2026, kaba buh ia u nongtrei bala shongthait kum u Adviser (Rules Committee) bad Senior Nazir, u President ka HYC Roy Kupar Synram ula ong ba ka Council ka pyrshah jur ia kane ka rukom leh ban wanrah biang ia ki nongtrei ba rim katba ki samla wad kam ki dang bteng ban iai ap ia ka jaka ba lait.

“Ka jingthungkam ia ki nongtrei bala shongthait kala pynmih sngew ia ka jingsngewkhia u paidbah halor ka jingiai bteng ka rukom leh ban aikam biang ia kiba la shongthait katba ki hajar ngut ki samla bala nang la stad ba khlem kam ha Meghalaya ba kin iaksaid sah ha kaban ioh ka lad iohkam” ong ka HYC ha ka kyrwoh ha ka sngi Nyngkong.

U Bah Roy ula ong ba kum kane ka rai ka pyni ia ka dak ka jingduh jingkyrmen ha ka por ba ki Ophis treikam ka Sorkar ki dei ban thaw ia ki lad ban thungkam thymmai bad ban kiew kyrdan.

“Ka jingiai thungkam biang ia ki briew bala shongthait ka khang ia ki lad ban thungkam thymmai, kiew kyrdan ban ka jingkiew ka shlem treikam” ula ong.

Ka Council kala buh jingkylli la kine ki kam ki donka hok shisha ia ki nongtrei bala shongthait bad lada don ki nongtrei kiba dang trei kiba lah ban shimti ia ka kam lane ka jingpyrkhat ia ki samla kiba don ka jingnang jingstad kaba biang ban trei .

“Ki Ophis treikam paidbah, khamtam ki Ophis kiba don hapoh ka riti synshar ka ri kum ka Meghalaya Legislative Assembly, ki dei ban bat ia ka jingtreikam kaba shai, ka jingkitkhlieh bad ka jingioh lad ba mar katjuh ha baroh ki jingthungkam” ong ka kyrwoh.

Haba maham ïa ka jingktah kaba kham ïar, ka HYC ka la ong ba ka rukom thungkam ïa kiba la shongthait ka lah ban pynskhem ïa ka rukom treikam kaba plie ka lad tang hapdeng ki katto katne ngut ki briew ba da jied.

Ka Council kala dawa ban shong bishar mardor ia kane ka jingthungkam ba dang shen bad dawa ia ka Assembly Secretariat ban pynpaw paidbah ia ka rukom pyniaid bad ka daw ha lyndet kane ka jingthungkam.