Shillong, Sept 22: U Nongialam ka Liang iatei ka Khasi Hills Autonomous District Council (KHADC) bah Titosstarwell Chyne hynne ka sngi ula pyni iaka jingbitar hapoh ka Dorbar Kyrpang jong ka ïingdorbar ka Council, halor ka kaiphod jong ka Khasi Hills Autonomous District (Khasi Social Custom of Clan Administration) Bill 2022.
Hashuwa kane u Deputy Chief Executive Member ka KHADC bah P.N Syiem ula wanrah iaka kaiphod jong ka KHAD (Khasi Social Custom of Clan Administration) Bill, 2022 ban iathir halor ki jingaijingmut bala phah daka tnat Law ka sorkar jylla.
Haba pynpaw ia ka jingkyntait ban pdiang ia kane ka kaiphod jong ka Executive Committee (EC) halor ka KHAD (Khasi Social Custom of Clan Administration) Bill 2022, u bah Titos ula ong ba lada ka ïingdorbar ka pdiang ia kane ka kaiphod ka pyni ba ki ophisar jong ka tnat Law ki kham heh kyrdan ban iaka ïing dorbar jong ka KHADC.
U bah Titos ula ong ba ia kane ka Bill la mynjur naduh u bnai Nailur 2022 daka ïingdorbar bad la phah ruh sha u Lat ka jylla ban ioh ka jingmynjur hadien baka ïing kam shem la lap ba don kano kano ka jyrwit jyrwat ha kane ka Bill.
“Nga kyntait ia kane ka kaiphod namar ka EC ka wanrah iaka kaiphod bala ai daki ophisar ka tnat Law ka sorkar jylla bad lada ka ïing ka pdiang ia kane ka Bill, ka pyni baka ïing kala hiar kyrdan. Namar kane nga dawa ba lada donkam ban wanrah jingkylla haka KHAD (Khasi Social Custom of Clan Administration) Bill, 2022, donkam ban iathir sani bha, ym ban shu pdiang iaka kaiphod” la ong u bah Titos.
Haba jubab ia kane u DyCEM ka KHADC ula pyntip ba ka sorkar jylla kala pynphai biang ia kane ka Bill daka ba pan jingpynshai namar ka kyntien ‘Clan’ ka don lang hapoh ka Clan Bill bad ka Lineage Act.
U bah P.N Syiem ula ong ba kam sym la thoh ha kano kano ba ki Bill jong ka KHADC kin iaid lyngba ka tnat DCA hashuwa ban leit sha u Lat ka jylla hynrei kadei hi ka rukom ban phah shwa shaka DCA ia ki bill ban eksamin da ki stad ka tnat Law ban suk u Lat ka jylla ba un mynjur ne ban kyntait ia kino kino ki Bill ka KHADC.
Hadien ba jur ka jingpyrshah iaka kaiphod, u Deputy Chairman ka KHADC ula pynbna ban shim biang iaka KHAD (Khasi Social Custom of Clan Administration) Bill 2022 bad ban ialad iaka Executive Committee ba kan thaw da ka Committee haka jingdon lang ki dkhot na baroh arliang ban iakhmih bniah iaki jingai jingmut hashuwa ban wanrah biang hapoh ka ïingdorbar.
