Nongpoh, Naiwieng 15 : Ka Voice of the People Party (VPP), kala pyrshah jur ia ka jingthmu jong ka Sorkar ban pynkylla noh ia ka jaka ba don ka Conservation Training Centre (CTI) ka Tnad Soil & Water Conservation, Byrnihat sha ka Industrial Estate.
Kane ka kynhun Lieng Pyrshah bala ialam da u President bad MLA ka Nongkrem Bah Ardent M Basaiawmoit, kala hiar jurip ia kane ka jaka ka CTI bad pyntip ba hording hordang, kan nym ailad satia ia ka Sorkar ban pynkylla sha ka Industrial Estate.
Ha kane ka jingleit jurip la don ryngkat u MLA ka Mawlai u Bah Brightstar Marbaniang, u MLA ka Mawryngkneng u Bah Heavingstone Kharpran ryngkat ka jingdon lang kiwei kiwei ki nongialam ka VPP party.
Haba kren sha ki lad pathai khubor, u Bah Ardent ula ong ba ka VPP kan nym ailad satia ban pynkylla Industrial Area ia kane ka jaka khamtam ia ka CTI kaba la ai shibun ki jingshakri ia ka Jylla. Ula ong ba lada ka Sorkar ka leh da ka bor, ka VPP ruh kan sa khot ia ki paidbah ban iapyni lem da ka bor
U pyntip ba ka VPP kala dep ruh ban ai da ka jingthoh sha ka Sorkar ba pyrshah jur ia kane ka jingthmu. “Nga la dep kren ruh hapoh ka Iingdorbar Thaw Ain ba pyrshah ia kane ka jingthmu ka Sorkar”.
