Shillong, Nailur 17 : Ka Thma U Rangli-Juki (TUR) ha ka sngi Ba-ar, kala kyntu ia ki nongpynmih khubor, ki nongthaw ne pynwandur khubor bad paidbah ba kin kyntait ia ka jingpynbna bala pynmih da ka Directorate of Information & Public Relation (DIPR) hapoh ka Meghalaya Communication Policy 2024, kaba hukum ia baroh kiba thmu ban pathai ia kino kino kiba ka Sorkar ka lah ban khein kum ki khubor ba kin leit register ialade bad ka DIPR.
“Kane ka jingpynbna ne hukum ka long be –ain namar ka policy kam dei ka ain bad ka policy ka dei tang ka jingkdew (guidelines) bad kumta kam don ia ka bor jong ka ain. Kaba sngewsih ka long ba ka Sorkar Meghalaya ka leh kum bym sngewthuh ia kata” ong ka Nongialam ka TUR kong Angela Rangad ha ka kyrwoh.
“Kane ka hukum jong ka Sorkar Meghalaya ka dei kaba iaid pyrshah ia ka hok jong ki nongshong shnong ban kren ne pynpaw laitluid bad ruh ka long pyrshah ia ka hok jong ki nongthoh kot khubor ne nongpynmih khubor ne ka press freedom kaba la saindur ha ka Riti Synshar ka Ri India” kala bynrap.
Ka kong Angela kala ong “Ka Meghalaya Communications policy 2024 ka ai bor palat pud ia ka Sorkar ba kan thew bad rai kut tang ma ka hi ia kino ki khubor kiba mih kiba lah ban ktah ia Sorkar Jylla, ka shong suk shong shngain, ka akor lane kaba ktah ia ka rain ka rem ki riewshimet”
Ka kong Angela kala ong “Ka long kaba kongsan ban pynkynmaw hangne ba ka Sorkar Pdeng ka lah hap ban pynsangeh bad buh shuwa sharud ia ka Ain rew kaba iadei bad ki kam pathai khubor ne kata ka Broadcasting Bill namar kane ruh ka ktah palat ia ka ka jinglaitluid ki nongthoh, ki nongpynmih khubor bad ki lad pathai khubor. Kumta bun kiba ieng pyrshah ia kane ka Ain rew”.
Ka kong Angela kala pynpaw ia ka jinglyngngoh ba ka Sorkar kam tip ia ka jingiapher hapdeng ka ain bad ka policy bad ka jingkylli ba ki lad pathai khubor ki hap hapoh ka Concurrent list jong ka Riti Synshar ka Ri ne ka thup ba ka Sorkar Pdeng ruh ka don ka bor ban thaw Ain.
“Kaba ma mynta ka long ba ki paidbah kiba kynthoh pyrshah ia ka jingbamsap ka Sorkar Meghalaya ha ki rynsan social media kin shah pynshitom kat kum kane ka policy thymmai. Hato kane kam ktah ia ka hok ban kren laitluid?. Ngi kyndit ruh ba kumno ki nongthoh khubor bad lad pathai khubor ruh kim shym pynpaw ei ei halor kane ka policy ha ka por ba dang pun ia ka” kala ong.
“Kane ka Meghalaya Communications Policy 2024 kam ktah tang ia ka hok ban kren, ban kdew laitluid bad ban thoh khubor laitluid. Hynrei ka ktah ruh ia ka hok kaba ngi ki nongshong shnong ngi ioh lyngba ka Right to Information Act 2005” kala bynrap.
Ka TUR ka kyntu bad kyrpad ia ki paralok nongthoh, nongpynmih khubor bad ki kynhun lad pathai khubor ban ieng pyrshah ia kane ka policy bad ia ka hukum jong ka Sorkar Jylla Meghalaya halor ka kam pynmih khubor.
