Nongpoh, Iaiong 09 : Ka Synjuk ki Seng Samla Shnong (SSSS)-Byrnihat Area, hynne ka sngi Ba-ar, kala dawa ia ka Khasi Hills Autonomous District Council (KHADC) bad Hima Mylliem ba kim dei ban pdiang ia ka jingdawa ki paid Garo ban ai bat kam Rangbah Shnong ha ki shnong khappud ka Ri-Bhoi khamtam ha Raid Marwet.
Ka SSSS bala ialam da u Chairman samla Kitbor Suting, kala iakynduh ia u Chief Executive Member (CEM) ka KHADC Bah Pyniaid Sing Syiem bad ruh ia u Syiem ka Hima Mylliem bad aiti ia ka dorkhas ba pynpaw ia ka jingpyrshah ia ka jingdawa ki paid Garo.
Ia ka SSSS-Byrnihat Area la synran ruh da u Chairman ka Synjuk ki Rangbah Shnong ka Ri-Bhoi District Bah BB Makdoh bad ruh ki Nongialam ka Synjuk ki Seng Samla Shnong-Shillong City.
Kane ka jingdawa kala mih hadien ba ki paid Garo lyngba ka All Ri-Bhoi Garo Headmen Association bad ka All Khasi Hills Achik Federation (AKHAF), kila dawa ban ailad lem ia ki Garo ba kin bat kam Rangbah Shnong ha ki shnong ba shong ba sah ki Garo. Kine ki Seng kila iakynduh ruh ia u Myntri Rangbah ka Jylla Conrad K Sangma ba un tuklar lem halor kane ka kam.
Haba kren sha ki lad pathai khubor hadien ka jingiakynduh ia u CEM bad Syiem Mylliem, u Chairman ka SSSS, ula pynpaw ba kane ka jingdawa jong ki paid Garo ka dei ka bym don nongrim satia bad kaba iaid pyrshah ia ka Mylliem Act, 2007 bad kumjuh ruh ia ka United khasi Jaintia Autonomous District Council (Appointment and succession of Chiefs and Headmen) Act, 1959.
Ula ong ba kat kum ka Mylliem Act, ki paid Garo ki dei tang ki raiot bad kim dei satia ki khun ki hajar ka Hima kiba lah ban bat ia ka kam Rangbah Shnong.
Nalor kane, ka SSSS-Byrnihat Area kala mudui ruh ha u CEM bad Syiem Mylliem halor ka jingdon ki Rangbah Shnong Garo kiba dang pyndonkam ia ka muhor bad ka Letter Head Rangbah Shnong wat hadien bala pynmih hukum da ka Ophis ka Dorbar Hima Mylliem lyngba ka shithi No.MS/V-15/2023/804-13 dated 16/05/2023.
Ha kajuh ka por, ka SSSS-Byrnihat kala kyntu jur ïa ka KHADC bad ruh ïa ka Hima Mylliem ba ki dei ban pynneh pynsah ïa ki kam synshar khadar bad ki riti ki dustur jong ki Khun Khasi kaba dei katkum ka riti (Customary Practice) ba la buh da ki longshuwa ki manshuwa.
