Shillong, Iaiong 09 : Ka Regional Democratic Alliance (RDA) jong ka United Democratic Party (UDP) bad Hill State People’s Democratic Party (HSPDP) hynne ka sngi Ba-ar, kala pyllait paidbah ia ka elekshon manifesto bad kular ban pynjur ia ka jingbuddien bad ka Sorkar Pdeng ban pyntreikam noh mardor ia ka Inner Line Permit (ILP), ban kynthup ia ka Ktien Khasi bad Garo ha ka Khyrnit ba phra bad ban pynbeit noh ia ki jingiakajia khappud bad ka Assam.
Kane ka manifesto ba 25 tylli ki mat ia kaba la pyllait da u President ka UDP Bah Metbah Lyngdoh , ka kular ruh ban pynkhlain ia ki Autonomous District Council (ADC) bad ban kyrshan ia ka jingiakren iasuk ba don jingmut bad ka Hynniewtrep National Liberation Council (HNLC).
Ka RDA kala pynieng ia u President barim ka HYC Bah Robertjune Kharjahrin kum u kyrtong na Shillong Parliamentary seat ha kane ka elekshon Lok Sabha, ka ban long ha ka 19 tarik Iaiong.
Ka manifesto ka ong ba ka RDA lada ka shah jied ban leit sha Parliament, kan buddien ia ka jingtyrwa ban pynkylla ia ka Sixth Schedule ha kaban kynthup ia ka jingpynkylla ia ka para 3 jong ka Sixth Schedule ka ban pynthikna ia ka kyntien “President” ban bujli da ka kyntien “Governor” ha ka para 12 A(b) jong ka Sixth Scheule, kaba ong ba ki ain bala mynjur da ka Parliament bad ki Assembly ka Jylla kin ym treikam ha ki jaka riewlum haba iadei bad ki rukom leh nala tynrai, ki ain riti dustur, ki jingleh niam, ki Iingkashai Civil bad criminal, ki Dorbar Shnong, ka khyndew ka shyiap, ka khlaw ka btap bad ki marpoh khyndew.
Ka RDA ka ong ba kan pynjur ia ka jingbuddien halor ka jingdawa pyntreikam ia ka Inner Line Permit (ILP) bad bynrap ba kan pyrshang katba lah ban kren ruh ia ka kam ker sainar ha khappud bad ban pynkha ia ka Police Border Wing.
Ka ong ba kan buddien tyngeh ruh ban pynkynthup ia ka ktien Khasi bad Garo ha ka khyrnit ba phra jong ka riti synshar ka ri India bad ban tynruh ha kaban pynlong ia ka ktien Khasi bad Garo kum ki Qualifying Language, nalor ka English bad Hindi, haba phai sha ka jingthungkam ha ki Ophis ka Sorkar Pdeng ha Meghalaya.
Halor ki kam khappud, ka manifesto ka ong ba ka RDA kan tynruh ba ka jingker sainar shah ha khappud ka Bangladesh ka dei ban long na u zero line bad ba dei ruh ban siew bai lutksan sha ki briew kiba duh noh ia ki jaka sha Bangladesh.
Ka bynrap ba ka RDA kan shim ruh ia ka sienjam ha kaban kyrpad ia ka Sorkar India ba kan pynbeit noh ia ka jingiakajia pud hadeng ka Assam bad Meghalaya kumba la pruid dak happh ka Sixth Schedule jong ka Riti Synshar ka Ri India.
Halor ka iohkam iohjam, ka RDA ka ong ba kan pynthikna ba ki samla ka Jylla kin shah phaikhmat bha bad ban don ruh ia ka National Youth Policy bad ka National Sports Policy kaba treikam.
Ka ong ba ka RDA kan shong bishar ruh haba iadei bad ka National Education Policy (NEP), ka Three-Language Formula, CUET, ka jingwanrah ia ka Engineering bad Medical College, ban iada ia ka hok ki rit paid kat kum ka jingngeit niam, ban pyrshah ia ka Uniform Civil Code (UCC), ban dawa pyllait pura ia ka jingtreikam ka CAA ha Meghalaya bad kiwei kiwei.
