Shah jied biang u Bah Wellbirth Rani kum u Chairman
Shillong, Nailur 11 : Ka North East Indigenous Peoples’ Forum (NEPIF), Shillong Chapter, kala pynpaw ia ka jingpyrshah kaba jur ia ka jingthmu jong ka Sorkar National Democratic Alliance (NDA) ba ialam da ka Bharatiya Janata Party (BJP), ban pynkylla kyrteng noh ia ka ‘India’sha ka ‘Bharat’.
“Ka NEIPF ka pyrshah jur ia ka jingthmu ka Sorkar NDA ban pynkylla kyrteng ia ka Ri India sha ka Ri Bharat. Ka ktien Bharat ka dei kaba mih na ka Sanskrit kaba la iasnoh lypa sha ka niam Hindu” ong u Nongaiktien ka NEIPF bad President ka FKJGP Bah Dundee C Khongsit.
Kane ka rai kala mih na ka jingialang pynthymmai nongkitkam jong ka NEIPF Shillong Chapter kaba long myn ha ka 9 tarik Nailur ha Shillong.
Kat kum ka jingong u Bah Dundee, ka Forum ka sngew ba kane ka dei tang ka buit elekshon jong ka BJP na ka bynta ka elekshon MP-2024 khamtam haba wat ka Riti Synshar ka Ri ne ka Iingkashari Supreme Court kala shah ban pyndonkam lang ia ka kyrteng ‘India’ ne ‘Bharat’.
Ha kajuh ka por, u Bah Dundee ula pyntip ba ka Forum kala pyrshah jur halor ka jingpyntreikam ia ka Uniform Civil Code (UCC) hapoh ka Jylla bad ka thain Shatei Lam Mihngi ka Ri haba pynpaw ba kane ka sienjam jong ka Sorkar Pdeng kan sa ktah jur ia ki rit paid bad ki riewlum, ha kaba ka por kan sa poi ba kin ym sngew trai shuh iala ka jong ka Ri.
Ha kane ka jingpynthymmai Nongkitkam, ka NEIFF ba kynthup ia ka FKJGP, HNYF bad RBYF kala jied biang ia u Vice Chairman ka Central Body bad President barim ka FKJGP Bah Wellbirth Rani kum u Chairman ka Shillong Chapter, u President ka RBYF Bah Bipul Thangkhiew kum u Vice Chairman bad u Asst GS ka FKJGP Bah Kitboklang Nongphlang kum u Vice Chairman, President ka HNYF Bah Sadon K Blah kum u General Secretary, Vice President ka FKJGP bah Eldie N Lyngdoh kum u Asst General Secretary lem bad u Bah Augustin Sten, President ka FKJGP Bah Dundee C Khongsit kum u Nongaiktien ka forum, u Nongialam ka RBYF Bah Wanpher Wahlang kum u Joint General Secretary ha ryngkat u Bah Shanbor Rapsang.
