Nongpoh, Naitung 11 : Ki Nongshongshnong ka Maikhuli, Ri-Bhoi District, ha ka sngi Thohdieng, kila iamih paidbah ban iakhih pyrshah ia ka Memorandum of Understanding (MoU) iapynbeit pud hapdeng ka Meghalaya bad Assam namar ka rai ban pynhap ia ka pung dohkha jong ka Shnong sha Assam.
Ka Maikhuli ka dei kawei na ki hynriew tylli ki jaka iakajia pud, kaba la dep ban iapynbeit ia u pud u sam ba thikna ha ka jingiakren pud jong ka wat ba nyngkong hapdeng ka Sorkar Meghalaya bad Assam.
Ki Nongshongshnong kila pynlong da ka rally ban pyrshah ia kane ka MoU haba dawa jur ia ka Sorkar Meghalaya ba ka dei ban pynbeit noh ia ka MoU bad ban pynthikna ba ka pung ri dohkha, kaba la bsa ia ka Shnong la Thaw la palat 50 snem, ka dei ban wan phai biang sha Meghalaya.
Ki Nongialam Shnong kila iathuh ba kane ka pung ri dohkha ka dei kaba la sumar bad khmih da ka Shnong Maikhuli bad ki nongshongshnong kila iakhun man ka snem ban iada ia u pud u sam pyrshah ia ka jingpynibor ka Assam, ban kam trai ia ka shnong Maikhuli.
Kila iathuh ba kat kum ka MoU, ki Myntri Rangbah ka Assam bad Meghalaya kila mynjur ba lum jingtep bad ka madan phutbol ka Maikhuli kan hap noh sha Meghalaya katba ia kane ka pung ri dohkha yn shim noh sha Assam.
Ka rally kala dawa ia ka Sorkar ban pynkylla biang ia ka MoU bad ban pynthikna ba kane ka pung ri dohkha kan leit biang sha ka shnong Maikhuli bad kan hap ha Meghalaya.
 iapynbeit pud hapdeng ka Meghalaya bad Assam namar ka rai ban pynhap ia ka pung dohkha jong ka Shnong sha Assam.){kind=link}