Shillong, Iaiong 27: Ka Khasi Students’ Union (KSU) ha ryngkat ki Khlieh Nongsynshar Shnong bad ki paidbah jong ki Shnong Khappud ka East Jaintia Hills, hynne ka sngi Thohdieng, kila pynlong ia ka jingiaiaid paidbah ban pynpaw ia ka jingpyrshah halor ka jingktah kti ki shipai BSF ia ki trai shnong ha Jingkieng Sonapyrdi.
Ia kane ka jingiaid paidbah sha Sonapyrdi la pynlong da ka KSU Narpuh Circle bad ka East Jaintia Hills District Unit ia kaba la kyrshan da ki Khlieh Nongsynshar Shnong bad ki nongshongshnong na Hingaria, Umstein, Sonapyrdi bad kiwei kiwei ki shnong kiba don ha khappud ka Bangladesh.
Kine ki nongiakhih kila rah ruh ia ki placard kiba pule “Ngin ym pdiang ia ki jingthombor bad jingleh donbor”, “Ngi pynrem jur ia ka jingpyndonkam bakla ia ka bor da ki shipai BSF ha Sonapyrdi”, “Ka Sorkar ka dei ban weng noh mardor ia ki shipai BSF”.
Haba kren ha ka jingialang, u Nongialam ka KSU samla KS Suchiang ula ong “Ngi dawa ia ka Sorkar ban weng noh mardor ia ki shipai BSF kiba don ha Sonapyrdi lane pynkhreh ia ka jingiakhih namar ki shipa BSF kila pyndik palat ia ki trai shnong ka thain. Ha ka jaka ban long ki nongiada, ki (BSF) la pyndik pynban ia ki trai shnong khlem kano kano ka daw”.
“Ngi na ka por sha ka por ngi la thoh sha ki bor District bad kumjh ruh sha ka Sorkar Jylla ban weng noh ia ki shipai BSF na Sonapyrdi hynrei baroh ar kila leh kyllut da kaba shah ia ki BSF ban iai bteng ia ki jingpyndik ia ki paidbah ka thain Narpuh bad ki shnong ha khappud” ula ong.
Ula ther ruh ia ki shipai BSF halor ka jingbym lah ban khanglad ia ki kam pyntriem jong ki nong Bangladesh ha khappud ka Bangladesh. “Ngi don ia ki BSF ban iada ia ki nongshongshnong? Kaei kaba kila leh pyrshah ia ka jingshah pyniap ka Longkmie ha Donaskur bad ka jingshah pyniap u Sylvanus Dhar? Kumta, ka bha ia ki ban leit ieng sha khappud ym ha ki shnong briew kiba jngai na ki khappud” ong u Suchiang.
Haba pynpaw ia kajuh ka jingsngew, u Rangbah Shnong ka Sonapyrdi Bah E Lamare ula buh jingkylli ba mano ba aibor ia ki shipai BSF ban buh ia ka ktem ha Sonapyrdi khlem ka jingbit jong ka Dorbar Shnong.
“Ngi dawa ia ka Sorkar Jylla ban bthah ia ka BSF ba kan weng noh ia ka ktem lashai ka sngi” ula ong.
 ha ryngkat ki Khlieh Nongsynshar Shnong bad ki paidbah jong ki Shnong Khappud ka East Jaintia Hills, hynne ka sngi Thohdieng, kila pynlong ia ka jingiaiaid paidbah ban pynpaw ia ka jingpyrshah halor ka jingktah kti ki shipai BSF ia ki trai shnong ha Jingkieng Sonapyrdi.){kind=link}