Pyrshah jur ka KSU ba thmu pynheh ka Star Cement ia ka jingtih par mawshun ha thain Narpuh

Shillong, Nailur 20: Ka Khasi Student Union (KSU) Narpuh Circle, ka la dawa ia ka Meghalaya State Pollution Control Board (MSPCB) ban nym ai jingbit ia ka kompani Star Cement ba kan pynheh bad pyniar ia ka mining lease/ ki par mawshun hapoh ka thain Narpuh.

Ka KSU Narpuh lyngba u President KS Suchiang bad u Secretary ka Environment Committee WD Gympad, ka la phah da ka dorkhas u Member Secretary ka MPSCB ba pynpaw ia ka jingpyrshah kaba jur ban shah pyniar bad pynheh ia ka mining lease/ki par mawshun jong kane ka kompani pynmih dewbilat.

Ha ka shithi, ka KSU ka la pyntip ba ka MSPCB jala pynmih ha ka kotkhubor ba kan pynlong ia ka jingpynsngew paidbah (Public hearing) ha ka 8 Risaw 2024 ha ka shnong Brichyrnot halor kane ka kam.

Ka KSU ka la pynpaw ba ka pyrshah jur ïa kane ka jingthmu ka Statr Cement ban pyniar ïa ka jingtih mawshun ha ka jaka kaba heh ym duna iaka 65 hectare namar ba kine ki par mawshun ki hap hapoh ka eco-sensitive zone jong ka Narpuh Wildlife Sanctuary bad ruh hajan ka wah Lukha.

“Ka jingailad ia ka kompeni ban pyniar ia ka jingtih mawshun kan wanrah tang ka jingpynjot kaba kham jur ia ka mariang, ia ki jingthung jingtep bad kumjuh kan ktah jur bad pyniap ia ki jaka rep, ia ki jingthung bapher bapher ba la thung ha katei ka thain bad kumjuh ruh ia ki nongshong shnong jong katei ka thain” ong ka KSU ha ka shithi.

Ka KSU ka la kynnoh ba ka dei ka jingshisha ba ka jingtih mawshun ha Elaka Narpuh ka la pynjulor kham bun ban ia ka jingbha, ia ka jaka bad ia kane la sakhi ba la pom bad pynkhuid ia ki khlaw, la pynkhyllem iaki lum, ka jingjaboh ha ki wah, ka Iyer kaba shit ka la nang kiew, ki jingthung jingtep bad ki jaka rep ki la shah ktah na ka jingmih ka Acid na ka jingtih mawshun bad ki karkhana kaba la ktah ia ki briew jong ka thain.

Halor kane ka KSU, ka kyntu ia ka ophis MSPCB ban weng noh ia ka jingpynbna halor ka jingpynsngew paidbah (Public) bala buh ha ka 8 Risaw 2024.