Pyrshah jur ka FKJGP ba thmu plie noh ka Sorkar ia ka surok Them Metor

Lada kwah kylluid ka Shillong, pynkynriah noh ia ki briew na Them Metor

Shillong, Naiwieng 01 : Ka Federation of Khasi Jaintia & Garo People (FKJGP), kala pynpaw ia ka jingpyrshah kaba jur ia ka jing thmu jong ka Sorkar ban plie noh ia ka surok Them Metor, ban pyniaid kali naduh ka 4 tarik u Naiwieng, 2024.

Deputy Commissioner ka East Khasi Hills Kong RM Kurbah, kala pynmih ia ka hukum ban plie noh ia ka surok na Them Iewmawlong sha Bimola (Them Metor) naduh ka 4 tarik Naiwieng, ban pynduna ia ka jing dheng kali ha thain ha Iewduh bad ka jingiaid beit iaid ryntih jong ki kali.

Ka DC ka pyntip ba ia ka ‘No Entry’ ha kane ka surok la weng noh naduh ka 4 tarik Naiwieng tang hapdeng ka por 8 baje mynstep haduh 4 baje janmiet.

Kane ka surok ka dei kaba la khang iaid kali (No Entry) naduh u bnai Jymmang 2018 ba mih ka jingiakhih pyrshah ia ki Harijan ba sah ha Them Metor. Kane ka jingiakhih kala mih hadien ka jingshah shoh ki arngut ki Khun jong u nongniah bos saw tang namar ba kah lynti kane k abos ia kawei ka kynthei Harijan ba rah um.

U Vice President ka FKJGP Bah Kitboklang Nongphlang ula ong “Kane ka jingleh ka Sorkar ka dei tang ka buit ban pynthame ia ki paid nongshongshnong ka Bri U Hynniewtrep, ban pynslem shuh shuh ia ka jingpynkynriah noh ia ki briew kiba sah be-ain ha Them Iew Mawlong kaba la angnud da ki paidbah la bun phew snem”.

“Ka FKJGP ka sngew ba ka jingaidaw jong ka Sorkar ban weng ia ka jingkhapngiah lane kata ka jingdheng kali ka dei tang ka daw ba kim mon satia ban pynkynriah ia ki briew bas ah beain lane lehse ki seng sain hima ki shim kabu na ka bynta ka jingmyntoi lade ha ka kam sain pyrthei” ula ong.

U Bah Kitboklang ula ong ba lada ka Sorkar ka thmu shisha ban pynkylluid ia ka sor Shillong bad ban weng ia ka jigndheng kali ha kitei ki jaka pdeng jong ka Sor, ka dei ban shim wut wut ia ki sienjam ban pynkynriah mardor ia ki briew ba sah be-ain ha Them Iew Mawlong ym ban shu ai da ki daw ba khlem nongrim.

“Ka FKJGP kam lah ban klet iaki jingjia shah bom shah tied, ki jingshah lute, ka jing shah leh kynshleiñ bad shah leh khlem akor jong ki samla kynthei bad longkmie Khasi ha kitei ki jaka kiba ju jia na ka por sha ka por namar ba kitei ki briew kiba sah be-aiñ ha katei ka jaka ki ioh leh thik kum ki khun khatduh jong ka sorkar jylla naduh ki por kiba mynshwa” ula bynrap.

Une u Nongialam ka FKJGP ula kynthoh ruh “Ka Seng kam pdiang satia ban plie noh ia kane ka surok ha Them Metor namar wat hadien ba khangdam ia ka surok ha kine ki hynriew snem, ngi la sakhi ia kiba bun ki kam bymman kynthup ka jingioh kem iaki nongdih bad nongkhaii drugs bad kumta ter ter”.

Ula kynthoh “ Ka jingpynbna jong ka Ophis ka Deputy Commissioner ba mih ha ka 30 tarik Risaw, ka dei kaba don jingiadei aiu re aiu sha lyndet”.

Ka FKJGP kala maham ia ka Sorkar Jylla bad ka dei ban shim ia ka jingkitkhlieh lada mih biang kino kino ki kynrum kynram haba dawa ruh ia ka Sorkar ba kam dei satia ban pynsngap ia ka jingwan tuklar bad mushlia da ki briew kiba dei na kiweipat ki Jylla halor ka jingpynkynriah ia ki briew bas ah be-ain ha Them Iew Mawlong.

Ha kajuh ka por, ka FKJGP ka kyntu ia baroh 36 ngut ki MLA ka Bri u Hynñiewtrep ban ieng tylli mlon ha ka ban pynkynriah ia ki briew ba sah be-ain ha Them Iew Mawlong.