Shillong, Risaw 20 : Ka Federation of Khasi Jaintia & Garo People (FKJGP)-Upper Shillong Circle, kala pynpaw ia ka jingpyrshah kaba jur halor ka jingthmu jong ka Sorkar ban pan ia ka No Objection Certificate (NoC) na ki nongshong dukan trei muluk kiba kamai jakpoh ha shilynter ka surok bah 7mer Upper Shillong.
Kine ki dukan ki dei kiba don ha syndah jong ka kynroh jong ka Head Quarter ka Eastern Air Command.
Ka FKJGP-Upper Shillong hapoh ka jingialam u President Bah Kitboklang Nongphlang uba dei ruh u Vice President ka FKJGP Sengkmie, kala leit ban tuklar ia ka jinghiar jurip jong ki bor Sorkar bad ki shipai Air Force ia kine ki dukan hynne ka step sngi palei.
Ka Ophis u Additional Deputy Commissioner ka East Khasi Hills Bah A.L Myrthong, ha ka 18 tarik kala phah ia ka shithi sha baroh ki dukan kiba don marjan bad ka kynroh ki shipai Air Force, ba pyntip ba kan don ka jingjurip ia kine ki dukan ha ryngkat ki shipai Air Force bad ki bor Shnong hynne ka 20 tarik Risaw.
Une u ADC ula bthah ia kine ki nongshong dukan ba ki dei ban don ha ki jaka die jingdie ha ka por ba wan jurip bad ba ki dei ruh ban wanrah lang ia ki kot ki sla ba iadei bad ka jaka die jingdie jong ki ha ryngkat ka NOC nalor kiwei kiwei, ba yn ioh ban khmih bniah.
Ka jingjurip ia kine ki dukan kala iaid beit hynne ka step bad la khlieh ia ka da ki Ophisar na ka Mylliem C&RD Block lem bad ki Engineer ka Tnad PWD ki ban sa phah ia ka kaiphod sha ka Ophis ka Deputy Commissioner.
“Ngi pyrshah jur ia kane ka jingbthah u ADC…ngim sngew don nongrim ba kane ka Ophis kan pan ia ki NoC ne ki kot ki sla na ki trai ri kiba shong dukan ban kamai jakpoh ha kane ka jaka (7mer)” ong u Bah Kitbok.
Une u Nongialam ka FKJGP ula ong baka Seng kala phah da ka kyrwoh kaba shai sha ki bor sorkar ne shipai Air Force ba kim dei ban mushlia ia ki trai ri trai muluk kiba kamai jakoh hala ka jong ka ri lem kumta ka seng ka long kaba khreh ban shim da kiwei pat ki sienjam.
Haba kylli, u Bah Kitbok ula ong ba ka Seng ka dawa jur ia ka Mylliem Block bad ia ka Tnad PWD ba kim dei ban shim rai bakla halor kane ka jingwan jurip khamtam eh ban kyndang ia ki trai ri trai muluk kiba shong kamai jakpoh ha kine ki dukan jong ka thain la bun snem mynta.
“Lada ka Ophis ka DC ne ka PWD ki phah kyndang ia kine ki dukan, ki dei ruh ban kyndang lut noh ia baroh ki dukan jong ki bar jylla kiba don ha rud ka surok PWD naduh Rilbong, Mahadev hkhola bad sha kiwei kiwei ki jaka ruh kumjuh ym tang ha ka thain Upper Shillong” ula ong.
